कोरोनाभाइरसको उपचार सम्बन्धी अप्रामाणिक भिडियोहरूबाट यूट्युबले नाफा कमाइरहेको आरोप टेक ट्रान्सपरेन्सी प्रोजेक्ट नामक संस्थाको प्रतिवेदनमा लगाइएको छ । 

यूट्युबले झूटो सूचना फैलिन नदिन प्रयास गरिरहेको बताएपनि यस्ता आधारहीन भिडियोहरू अप्लोड भइरहेका छन् । 

गूगलको स्वामित्व रहेको यूट्युबले कोभिड–१९ को उपचार गर्ने भन्दै जडीबुटी, ध्यान लगाउने संगीत र असुरक्षित औषधिहरूको प्रवर्द्धन गर्ने भिडियोमा विज्ञापन हालिरहेको शुक्रवार प्रकाशित प्रतिवेदनमा उल्लेख गरिएको छ । 

प्रतिवेदनमा कम्तीमा सातवटा भिडियोमा त्यस्ता शंकास्पद उपचार विधि बताइएको उल्लेख छ ।