प्रदेश २ का मुख्यमन्त्री लालबाबु राउतले कोरोना भाइरस (कोभिड–१९)को सङ्क्रमण नियन्त्रणका लागि दृढ इच्छाशक्तिका साथ प्रदेश सरकार अगाडि बढेको बताउँदै अहिलेसम्म आत्तिनुपर्ने अवस्था नरहेको बताउनुभएको छ ।

गोरखापत्रसँगको कुराकानीमा उनले लकडाउनको पालना गरी घरभित्रै रहेर सावधानी अपनाउनु हामी सबैको कर्तव्य हो र यसको सबैले पालना गर्नुपर्छ भने। उनले थपे, 'यस सङ्कटको घडीमा सबैको सहयोग र साथ आवश्यक छ, यहाँका नागरिक र सबै राजनीतिक दल एकजुट भएर लाग्नुपर्छ । तीन तहकै सरकारबीच समन्वय हुनुपर्छ ।'

कोरोना भाइरस महामारीका रूपमा फैलिन नदिन प्रदेश सरकार सचेत भएर स्वास्थ्यसँग जोडिएका विभिन्न क्षेत्रका कामलाई गति दिएको उनको भनाइ छ । प्रदेशको आठवटै जिल्लाका विभिन्न १२२ स्थानमा दुई हजार ४३४ शøयाको क्वारेन्टाइन तयारी अवस्थामा रहेको जानकारी दिँदै उनले स्थानीय तह, नेपाली सेना र सशस्त्र प्रहरीसँगको समन्वय र सहकार्यमा न्यूनतम मापदण्ड पुर्‍याएर क्वारेन्टाइन तयार पारिएको बताए ।

मुख्यमन्त्री राउतले सात सयभन्दा बढी व्यक्ति क्वारेन्टाइनमा र आठ सयभन्दा बढी होम क्वारेन्टाइनमा बसिरहेको जानकारी पनि दिनुभयो । उनले ७३ शøयाको आइसोलेसन तयारी अवस्थामा रहेको र अन्य तयार पार्ने काम भइरहेको बताउँदै प्रदेशका १३६ वटै पालिकालाई कम्तीमा २० शøया भएको क्वारेन्टाइन निर्माणका लागि आग्रह गरिएको र सोहीअनुरूप पालिकाहरूले काम गरिरहेको उल्लेख गर्नुभयो । कोरोना भाइरस परीक्षण गर्ने रियल टाइम पीसीआर मेसिन पनि प्रदेश राजधानी जनकपुरधाममा जडान भइसकेको र शुक्रबारबाट नमुना परीक्षणको काम पनि सुरु भएकाले यहाँका बिरामीलाई अब उपचारमा सहज हुने उनले जानकारी दिए।

मुख्यमन्त्री राउतले ५० वटा भेन्टिलेटर र दुईवटा कोेरोना परीक्षण गर्ने मेसिन पीसीआर थप्न कोरोना महामारी नियन्त्रणका लागि गठित निर्देशक समितिलाई निर्देशन दिई सकिएको बताए ।

यस महामारीविरुद्धको प्रादेशिक तयारीलाई थप प्रभावकारी बनाउन आवश्यक प्रोफेसनल प्रोटेक्टिभ इक्युपमेन्ट, एन ९५ मास्क, थर्मल गनजस्ता स्वास्थ्य सामग्रीको व्यवस्थापनमा प्रदेश सरकारले जोड दिएको छ । लकडाउनको अवधिभर प्रदेशका गरिब तथा दैनिक ज्यालादारीका काम गर्ने मजदुरहरूको खानाको व्यवस्थापनका लागि १३६ वटै पालिकालाई प्रदेश सरकारले रकम उपलब्ध गराइसकेको उनले बताए ।

स्थानीय तहले विपन्न र मजदुरको तथ्याङ्क सङ्कलन गरी सर्वपक्षीय समिति गठन गरेर वडास्तरबाटै एकद्वार प्रणालीमार्फत खाद्यान्नका लागि राहत उपलब्ध गराउने काम अगाडि बढाउने बताउँदै उनले कोरोनाको उपचारमा खटिने चिकित्सकहरूका लागि विभिन्न खालका प्रोत्साहन भत्तासमेत दिने निर्णय भएको स्पष्ट गरे।

उपचार गर्न आनाकानी गर्ने निजी अस्पताल वा लकडाउनको बेला कालोबजारी गर्ने व्यापारीलाई प्रदेश सरकारले छुट नदिने बताए ।

लकडाउनको समयमा जनतालाई आवश्यक खाद्यान्नको सहज आपूर्तिका लागि आठवटै जिल्लाका प्रमुख जिल्ला अधिकारीलाई निर्देशन दिइएको र प्रजिअहरूले लकडाउनको समय अवधिमै केही समय निकालेर सामाजिक दूरी कायम गरी बजार खोल्न लगाउनेजस्ता काम गरिरहेको मुख्यमन्त्री राउतको भनाइ छ ।  गोरखापत्र दैनिकमा खबर छ ।