कोरोनाभाइरस महाव्याधिका कारण बेलायतमा गरीबी बढिरहेको छ । विश्वव्यापी आर्थिक मन्दीपछिको एक दशकसम्म सरकारी खर्चकटौती गरिँदा गरीबको संख्या बढेकोमा अहिले त्यो झन् चर्किएको हो । 

आधिकारिक तथ्यांकअनुसार, बेलायतमा एक करोड ४० लाखभन्दा बढी मानिस गरीबीमा बाँचिरहेका छन् । त्यो भनेको त्यहाँको् जनसंख्याको लगभग एक चौथाइ हो । 

लगभग ४२ लाख बालबालिका गरीब रहेको सरकारी आँकडाले देखाएका छन् । 

अहिले लकडाउनका कारण बेलायतीहरूले रोजगारी गुमाइरहेकाले परिस्थति झनै बिग्रेर गएको छ । 

विगत १५ दिनमा लगभग १० लाख वयस्कहरूले युनिभर्सल क्रेडिटका लागि निवेदन दिएका छन् । त्यो राज्यले दिने प्रमुख नगद सहायता हो । 

सामान्य बेलामा दुई हप्ताको अवधिमा आउने निवेदनभन्दा यो दश गुणा बढी हो । 

सरकारी सहायता पाउने २५ वर्षभन्दा माथिको वयस्कले प्रतिवर्ष थप एक हजार पाउन्ड पाउनेछ ।

अहिले दिइने मासिक सहायता रकम ४०० पाउन्ड पुर्‍याइएको छ । तर बेलायतमा गरीबी टार्नका लागि एकजना व्यक्तिलाई औसतमा ६०० पाउन्ड आवश्यक पर्छ ।