अमेरिकाका राष्ट्रपति डोनल्ड ट्रम्पले शनिवार ह्वाइट हाउसमा आयोजित पत्रकार सम्मेलनमा कोभिड–१९ विरुद्ध हाइड्रोक्सीक्लोरोकिन नामक औषधि लिन सक्ने बताएका छन् । 

कोरोनाभाइरसबाट जोगिनका लागि यो औषधि प्रभावकारी रहेको उनको भनाइ छ तर शोधकर्ताहरूले त्यसलाई शंका व्यक्त गरेका छन् । 

‘मानिसहरूले हाइड्रोक्सीक्लोरोकिन लिन थाले हुन्छ जस्तो लाग्छ,’ उनले पत्रकारहरूलाई बताए । ‘मैले लिनुपर्ने भएको भए लिन सक्थें । मेरा चिकित्सकहरूलाई सोध्नुपर्छ । तर म लिन्थें होला ।’

लपस नामक रोगका रोगीहरूलाई प्रायः हाइड्रोक्सीक्लोरोकिनले उपचार गरिन्छ र तिनलाई कोभिड–१९ कमै लागेको देखिएको ट्रम्पको भनाइ छ । 

‘त्यो सत्य हुन पनि सक्छ, नहुन पनि सक्छ । तपाईंहरू किन अनुसन्धान गर्नुहुन्न ?’ उनले सोधे ।

ट्रम्पको उक्त भनाइपछि अमेरिकाका शीर्ष सरुवा रोग विशेषज्ञ डा एन्थोनी फाउचीले भने, ‘टिप्पणी गर्न सक्ने गरी हामीसँग निश्चित सूचना छैन ।’ लपस र कोभिड–१९ बीचको सम्बन्ध अनुसन्धानकै घेरामा रहेको पनि उनले बताए । 

विज्ञहरूले कोभिड–१९ बाट बच्नका लागि हाइड्रोक्सीक्लोरोकिन लिने सल्लाह दिएका छैनन् किनकि भाइरस संक्रमणलाई यसले रोक्छ भन्ने कुनै पनि प्रमाण फेला परेको छैन ।