स्वास्थ्य तथा जनसंख्या मन्त्रालयका प्रवक्ता डाक्टर विकास देवकोटाले विदेशबाट आएका सबै कोभिड १९ संक्रमितहरूको ‘कन्ट्याक्ट ट्रेसिङ’ सकिएको बताएका छन् ।  

बुधवार स्वास्थ्य मन्त्रालयले गर्ने नियमित ब्रिफिङमा बोल्दै डाक्टर देवकोटाले विश्व स्वास्थ्य संगठनको मापदण्डअनुसारको कन्ट्याक्ट ट्रेसिङ सकिएको बताएका हुन् ।

‘विदेशबाट आएका कोरोना संक्रमित सबैको कन्ट्याक्ट ट्रेसिङ सकिएको छ,’ प्रवक्ता देवकोटाले भने, ‘यससँगै हामीले उपत्याकाबाहिर परीक्षणका लागि नमूना संकलन तीव्र पारेका छौं ।’

उनले काठमाडौँमा हालसम्म १९ सय ६५ परीक्षण भएको र उपत्याकाबाहिर ४ सय १ नमूना परीक्षण भएको जानकारी दिए । आज मात्र १ सय ८० नमूना परीक्षण चलिरहेको र त्यसको नतिजा आउन बाँकी रहेको उनले बताए ।

उनले र्यापिड टेस्ट किटबाट परीक्षण गर्ने गरी कैलाली र कन्चनपुरमा नमूना संकलन गर्न टोली खटिएको जानकारी दिएका छन् ।

‘कैलाली र कन्चनपुरमा परिचालित टोलीले र्यापिड किटबाट र पीसीआरबाट परीक्षण गर्ने गरी दुवै प्रकारका नमूना संकलन गरिरहेको छ,’ डाक्टर देवकोटाले भने । 

उनले अहिलेसम्म उपत्याकामा १२ जना र उपत्याकाबाहिर १ सय ३४ जनालाई आइसोलेसनमा राखिएको बताए । डाक्टर देवकोटाका अनुसार अहिले नेपालमा ८ हजार ५ सय ८० जना क्वारेन्टाइनमा छन् ।

‘जिल्ला तहको कोभिड १९ क्राइसिस म्यानेजमेन्ट सेन्टर निर्माण भइरहेको छ,’ उनले भने, ‘छाउनी अस्पतालमा १०० भन्दा बढी बेडहरू पूर्ण तयारी अवस्थामा छन् । कोभिड १९ रोकथाम, नियन्त्रण र उपचारका लागि नीतिगत व्यवस्था र कार्यविधि तय गरिएको छ । क्वारेन्टाइनको निर्देशिका पनि जारी भएको छ ।’

उनले संक्रमितको निधन भएमा शव कसरी व्यवस्थापन गर्ने भन्ने विषयमा समेत कार्यविधि तयार पारेको बताए । ‘यी सबै कार्यविधिहरू मन्त्रालयको वेबसाइटमा राखिएको छ,’ उनले भने ।

डाक्टर देवकोटाले उपत्याका बाहिर धनगढी, पोखरा र नेपालगंजमा ३ वटा ठूला पीसीआर मेसिन राखिएको बताए ।