उपचारको क्रममा बुटवलको कोरोना अस्पतालमा मृत्यु भएका रुपन्देहीको सैनामैनाका बाबुराम थापाको शव बुझ्न परिवार राजी भएका छन् । 

बुधवार ५ नम्बर प्रदेशको सामाजिक विकास मन्त्रालयमा भएको सर्वपक्षीय छलफलपछि ज्यान गुमाएको ११ दिनपछि बाबुरामको शव बुझ्ने सहमति जुटेको हो । 

सहमतिपछि परिवारले शव बुझेका छन् । छलफलमा सहभागी मानवअधिकार तथा शान्ति समाजका केन्द्रीय उपाध्यक्ष गोबिन्द खनालले मृतककी पत्नीलाई रोजगारी, छोराहरूको निःशुल्क शिक्षा र तत्कालको लागि आर्थिक व्यवस्थापन जुटाइदिने सहमतिपछि परिवार शव बुझ्न राजी भएको जानकारी दिए ।

थापाकी पत्नी रीताले पनि छलफलपछि शव बुझ्ने सहमति भएको जानकारी गराइन् । खनालले भने,  ‘मृतककी पत्नीलाई सैनामैना नगरपालिले रोजगारी दिने, २ छोरालाई १२ कक्षासम्म निःशुल्क शिक्षाको व्यवस्था गर्ने, तत्कालको आर्थिक व्यवस्थापनको लागि ८ लाख ४१ जना हजार रुपैयाँ नगद रकम उपलब्ध गराउने सहमति भयो ।’ 

लुम्बिनी प्रादेशिक अस्पतालको शवगृहमा रहेको शव परिवारले बुधवार नै बुझेर अन्तिम संस्कार गर्नेछन् । प्रदेश सरकारले आवश्यक सहयोग गर्नेछ । पीडित पक्षको माग सम्बोधन गर्न सरोकारवाला पक्षलाई चौतर्फी दबाबका लागि मानव अधिकारकर्मी र नागरिक समाज लागि परेको थियो ।

पाल्पाको रिब्दिकोट–५ कुसुमखोला स्थायी घर भई थापा परिवार सैनामैना नगरपालिका–४ सिसौडाँडामा डेरामा बस्दै आएको छ । दुबईबाट चैत्र पहिलो हप्ता नेपाल फर्किएका थापा उपचारका लागि चैत १३ गते लुम्बिनी प्रादेशिक अस्पताल आएका थिए ।

अस्पतालमा भर्ना भएको चौथो दिन चैत्र १६ गते धागो कारखानामा बनाइएको कोरोना विशेष अस्थायी अस्पतालमा उनको ज्यान गएको थियो । उनको मृत्यु भएको दिन मात्रै स्वाब परीक्षणका लागि पठाइएको थियो भने दोस्रो दिन मात्रै रिपोर्ट ‘नेगेटिभ’ आएको थियो ।