कर्णाली प्रदेश सभा सदस्य दानसिंह परियारले सुर्खेतमा उपचार गराई अलपत्र दुई जनाको एम्बुलेन्स खर्च तिरेर उद्धार गरी बुधबार मुगु पठाएका छन्।

कोरोना भाइरसको त्रासका कारण सरकारले लकडाउन गरेपछि उपचारमा रहेका छायानाथ रारा  १३ का डिलबहादुर कामी र नेपालगन्ज भेरी अस्पतालमा पेटको बिरामी भएर मुगु फर्किने क्रममा सुर्खेतमा छाँयानाथ रारा १० का सुरबहादुर नेपालीको उद्धार गरेका हुन्। 

‘हामीसँग भएको उपचार खर्च सबै सकिएको थियो। अस्पतालमा बस्दा झन खर्च भइरहेको थियो,’ १५ दिन देउती अस्पतालमा उपचार गराइरहेका डिलबहादुरले लोकान्तरलाई भने, ‘उहाँले ४५ हजार भन्दा बढी निजी खर्च गरेर हामीलाई मुगु पठाई दिनु भएको छ। उहाँलाई सधैं भगवानले साथ देओस भन्ने कामना गर्दछु।’

उनले आर्थिक अवस्था कमजोर भएका कारण आफू गमगढी पुग्न नसक्ने अवस्थामा रहेका बेला सांसद परियारले गरेको सहयोग जीवनमा भूल्न नसक्ने बताए। उनी मुगुमै सडक दुर्घटनामा परि घाईते भएका कारण करिब १५ दिन देखि देउती अस्पताल सुर्खेतमा उपचाररत रहेका थिए। अर्का सुरबहादुर नेपालगञ्जमा उपचार गरी सुर्खेतमा आइ अलपत्र परेका थिए। ती दुवै जनालाई सांसद परियारले उद्धार गरेका हुन्।

‘उहाँहरुको आर्थिक अवस्था अत्यन्तै दयनीय थियो । मैले नीजि खर्चमा भएपनि उहाँलाई घरसम्म जानको लागि एम्बुलेन्सको व्यवस्था गरि पठाईदिएको छु,’ उनले भने, ‘यसका अलावा अलपत्र परेका सयौं मुगाली जनतालाई उद्धार गरी मुगु पठाइसकेको छु ।’