सुर्खेतको वीरेन्द्रनगर नगरपालिकाले लकडाउनबाट प्रभावितहरुका लागि राहत प्याकेज घोषणा गरेको छ।  

नगरपालिका कार्यपालिकाको बुधबारको बैठकले नगरपालिकामा अस्थायी बसोबास गरी ज्यालामजदुरी गर्ने वर्ग र घरभाडामा बसी अध्ययनरत विद्यार्थीलाई राहत दिने निर्णय गरेको हो।

नगरपालिकाका प्रमुख प्रशासकीय अधिकृत टीकाराम ढकालका अनुसार साँझबिहान छाक टार्न समस्यामा परेका मजदुर/विपन्न वर्ग तथा लकडाउनका कारण न्यूनतम् खाद्यान्न समेत व्यवस्था गर्न नसकेका विद्यार्थीलाई दालचामल, नुन, तेल उपलब्ध गराइने छ। 

त्यसका लागि नगरस्तरीय विभिन्न १६ वटा योजनाबाट प्रतियोजना ५/५ लाखको दरले बजेट कटौती गरी ८० लाख बिनियोजन गरिएको छ। उक्त रकम कोरोना संक्रमण रोकथाम, नियन्त्रण र उपचार कोषमा रकमान्तर गरी खर्च गर्ने निर्णय भएको छ। 

उनले भने, ‘राहत प्राप्त गर्ने लाभग्राहीको विवरण सम्बन्धित घरधनी तथा टोल विकास संस्थाको सिफारिसमा वडा कार्यालय मार्फत प्राप्त गरी तत् तत् कार्यालयद्वारा वितरण गर्ने, वास्तविक वर्गले राहत पाउने गरी सबै वडा कार्यालयले राहत वितरण पश्चात सार्वजनिक सुनुवाई र सामाजिक परीक्षण समेत गर्ने व्यवस्था मिलाउने, मापदण्ड विपरित गलत नाम सिफारिस गर्ने घरधनी, टोल विकास पदाधिकारी र राहत लिने परिवारलाई समेत नगरपालिकाले कार्वाही गर्ने र आगामी दिनमा सेवा सुविधा रोक्ने गरी वितरित राहत असुल उपर गर्ने निर्णय गरेको छ।’

कार्यवाहक प्रमुख मोहनमाया ढकालले नगरपालिका अन्तर्गतका आफ्नो घर बहालमा दिएका सबै जनप्रतिनिधिले चैत महिनाको घर भाडा मिनाह गर्ने निर्णय गरेको जानकारी दिइन्। साथै घर बहालमा दिएका घरधनीलाई समेत एक महिनाको भाडा मिनाह गरिदिन आग्रह गर्ने निर्णय भएको उनको भनाइ छ।

नगरपालिकामा हालसम्म ६ हजार परिवारलाई राहत वितरण गरिसकिएको छ।