भारतको बिहार राज्यको बेतियामा रहेको कलेक्टर अफिसले नेपालबाट भारत प्रवेश गरेर कोरोनाभाइरस फैलाउने षड्यन्त्र गरेको भन्दै सतर्क रहन आग्रह गरेको छ । 

मंगलवार प्रहरी अधीक्षकलाई एक पत्र लेखेर जिल्ला पदाधिकारी कुन्दन कुमारले जालिम मुखिया नामक व्यक्ति नेपालबाट कोरोना महामारी फैलाउने योजना बनाइरहेको जानकारी दिए । उक्त व्यक्ति पर्सामा बस्ने र उसले सीमापारि हतियारको अनि नक्कली भारुको तस्करी गर्ने गरेको पनि पत्रमा उल्लेख छ । 

ऊसँगै ४० देखि ५० मानिस पनि भारत आउन लागेको पत्रमा लेखिएको छ । 

भारत नेपाल सीमामा यथेष्ट सतर्कता अपनाउँदै सबै किसिमका शंकास्पद गतिविधिमाथि कडा निगरानी बढाउन पनि पत्रमा निर्देशन दिइएको छ । 

सशस्त्र सीमा बलका डीजीले सीमामा आफूहरूले निकै कडीकडाउ गरेको र नेपालले पनि कडा निगरानी गरिरहेको बताएको समाचार संस्था एएनआईले लेखेको छ । जिल्ला पदाधिकारीको पत्र गोप्य सूचनामा आधारित रहेको उनले बताएको समाचारमा लेखिएको छ ।