कोरोनाको संक्रमणका कारण गत आइतवारदेखि अस्पतालमा उपचाररत बेलायती प्रधानमन्त्री बोरिस जोनसनको स्वास्थ्यस्थितिमा केही सुधार आएको छ ।

कोरोनाको संक्रमण देखिएपछि आइसोलेसनमा भर्ना गरिएका जोनसनको अवस्थामा सुधार नआएपछि उनलाई ३ दिनसम्म आइसियुमा राखिएको थियो ।

लण्डनको थोमस अस्पतालमा उपचार गराइरहेका जोनसनको स्वास्थ्यमा पहिलो चरणको सुधार आएको डाक्टरहरूले बताएका छन् ।

स्वास्थ्यमा सुधार आएसँगै उनलाई आइसीयुबाट निकालिएको छ ।

शुक्रवार उनलाई उनले चलाउने मोबाइल दिइएको थियो । मोबाइल भेट्टाउने बित्तिकै उनले आफ्नी गर्भवती प्रेमिका क्यारी साइमण्डसँग कुरा गर्न हतारिएका थिए ।

अस्पताल स्रोतले जोनसनले आफूलाई उपचार गर्ने चिकित्सकहरूलाई हात हल्लाएर अविवादन गरेको भन्दै डेली मेलले समाचार प्रकाशित गरेको छ ।