कोरोनाभाइरस (कोभिड– १९)ले महामारीको रूप धारण गरेपछि सिंगो विश्व आक्रान्त छ । नेपालमा पनि संक्रमितको संख्या १२ पुगिसकेको छ ।

कोरोनाको दोस्रो संक्रमित भेटिएपछि नेपाल सरकारले चैत ११ गतेदेखि देशभर लकडाउन घोषणा गर्‍यो । त्यसपछि २ पटक थप भएर लकडाउनको अवधि वैशाख ३ गतेसम्म लम्बिएको छ ।

लकडाउन अझै कहिले खुल्ने हो निधो नहुँदा अधिकांश नागरिक घरभित्र परिवारसँगै बसिरहेका छन् । दिन कटाउन गाह्रो हुन थालेको कुरा कतिपयले सामाजिक सञ्जालमा लेखेको पनि देख्न सकिन्छ ।

यसै क्रममा आइतवार पशुपतिनाथ मन्दिर परिसरमा पुग्दा केही मानिसहरू बिन्दास पारामा सुतिरहेका भेटिए ।

बाग्मती किनारदेखि मृगस्थली र विभिन्न देवालयमा मानिसहरू सुतिरहेका भेटिए ।

विकास लामा नाम बताउने एक व्यक्तिले अहिले सुतेरै दिन बितिरहेको बताए ।

‘अरू बेलामा मानिसहरू धेरै आउँथे, पैसा टिपेर दिन बित्थ्यो, अहिले कोही आउँदैनन्, के गर्ने ? सुतेरै दिन बितेको छ,’ उनले लोकान्तरसँग भने, ‘लकडाउन कि के भन्छन्, दिनभरि घाम लाग्छ, मस्त सुतेर दिन बताउने हो ।’
कोही न कोही आएर नियमितजसो खाद्यान्न बाँडेकाले खानको चिन्ता भने नभएको उनको भनाइ थियो ।

पशुपतिमै भेटिएका अर्का एक व्यक्तिले पनि एक डेढ महिनालाई पुग्ने खाद्यान्न राहतमा पाइसकेकाले ढुक्कसँग सुतेर दिन बिताउने गरेको बताए ।

४ पटक राहत बुझिसकेको उनको भनाइ थियो ।

हेर्नुहोस्, फोटोहरू :