सरकारले कोरोना भाइरस (कोभिड-१९) का विश्वव्यापी अर्थतन्त्रमा आएको मन्दीको असर रोजगारी क्षेत्रमा समेत पर्ने आकलन गर्दै विशेष योजना बनाउने भएको छ।

कोरोनाका कारण अर्थतन्त्र शिथिल हुँदा स्वदेश तथा विदेशमा रहेका कयौँ नेपाली गाउँघर फर्किरहेका छन्। कतिपयले रोजगारी गुमाइसकेका छन्, भने कतिको रोजगारी जोखिममा परेको छ।

यो अवस्थामा युवालाई आफ्नै भूमिमा उद्यमशिलतामा लगाउने उद्देश्यले उद्योग, वाणिज्य तथा आपूर्ति मन्त्रालयले उत्पादनशील उद्यमशिलतामा सहभागी गराउन विशेष योजना तयार गर्न लागेको हो।

तयसका लागि एक कार्यदल गठन गर्ने निर्णय भएको छ। नव गठित कार्यदललाई १५ दिन भित्र सुझाव सहितको प्रतिवेदन पेश गर्न समय दिएको छ। 

उद्योग, वाणिज्य तथा आपूर्ति मन्त्रालयको औद्योगिक लगानी तथा प्रर्वद्धन महाशाखा प्रमुखको संयोजकत्वमा कृषि तथा पशुपंक्षी, अर्थ, संघीय मामिला तथा सामान्य प्रशासन मन्त्रालयका प्रतिनिधि  तथा उद्योगका छाता संगठनका प्रतिनिधिसहितको कार्यदल बनेको हो। 

उद्योग वाणिज्य तथा आपुर्ति मन्त्रालयको आयोजनामा आइतबार उद्योग वाणिज्य महासंघ, उद्योग वाणिज्य परिसंघ, घरेलु तथा साना उद्योग महासंघ, नेपाल चेम्बर अफ कमर्स लगायतका प्रतिनिधिको बैठकले यस्ताे निर्णय गरेकाे हाे ।