२६ जेठ २०८३, मंगलबार
प्रधानमन्त्रीको ठाडो प्रस्तावमा राजनीतिक दल विभाजनसम्बन्धी अध्यादेश ल्याउने निर्णय मन्त्रिपरिषद्बाट भएलगत्तै पूर्वमाओवादी खेमाका मन्त्रीहरूबीच छुट्टै छलफल भएको छ ।
ऊर्जा मन्त्रालयमा भएको छलफलमा ऊर्जामन्त्री वर्षमान पुन, वनमन्त्री शक्ति बस्नेत, उद्योग मन्त्री लेखराज भट्ट, शिक्षामन्त्री गिरिराजमणि पोखरेल, खानेपानी मन्त्री बिना मगर लगायत सहभागी थिए ।
छलफलले प्रधानमन्त्रीको ठाडो प्रस्तावमा गरिएको निर्णय गम्भीर षड्यन्त्र भएको निष्कर्ष निकालेको छ ।
'अहिलेको यो विषम परिस्थितिमा यस्तो निर्णय हुनु गम्भीर षड्यन्त्र हो भन्ने हाम्रो निष्कर्ष रह्यो,' एक मन्त्रीले लोकान्तरसँग भने ।
उनका अनुसार छलफलले 'परिस्थितिको डटेर सामना गर्ने र आवश्यक पर्दा धेरै अघि बढेर निर्णय लिन पनि पछि नपर्ने' निष्कर्ष समेत निकालेको छ ।
छलफललगत्तै निष्कर्ष सहितको सन्देश लिएर ऊर्जामन्त्री पुन नेकपा अध्यक्ष पुष्पकमल दाहाल 'प्रचण्ड' निवास खुमलटार पुगेका छन् ।
