सरकारले स्थापना गरेको कोरोना भाइरस रोकथाम, नियन्त्रण तथा उपचार कोषमा २ अर्ब १३ करोड १० लाख ९१ हजार ७४७ जम्मा भएको छ ।

प्रधानमन्त्री तथा मन्त्रिपरिषद् कार्यालयका प्रवक्ता राजेन्द्रकुमार पौडेलका अनुसार शुक्रवार अपराह्नसम्म उक्त परिमाणमा सहयोग रकम जम्मा भएको हो ।

सरकारी संघसंस्था वा निकायबाट सहयोग आउने क्रम जारी छ । प्राप्त विवरणअनुसार अम्बे स्टिलले २५ लाख रुपैयाँ, सगरमाथा इन्स्योेन्स कम्पनीले १६ लाख रुपैयाँ, नेपाल इँटा उद्योग महासंघले ५ लाख रुपैयाँ कोषमा जम्मा गरेका छन् ।

नेपाल निजामती कर्मचारी संघठन, अर्थ विभागीय कार्यसमितिले २ लाख १ हजार १११, क्षेत्रीय कृषि अनुसन्धान केन्द्रले १ लाख ६८ हजार ४५३, डिभिजन वन कार्यालय सल्यानले १ लाख ६२ हजार ५०५, चामुन्द्रा विन्दासैनी नगरपालिकाले १ लाख ५८ हजार १३३ जम्मा गरेको छ भने र भीमप्रसाद भट्टराईले १ लाख ३१ हजार १३१ रकम कोषमा जम्मा गरेका छन् ।

नाम नखुलेका तथा १ लाखभन्दा कम सहयोग गर्ने विभिन्न व्यक्ति तथा संस्थाको ४६ लाख ५९ हजार २८३ रुपैयाँ रकम जम्मा भएको प्रवक्ता पौडेलले जानकारी दिए । सरकारले गत चैत १० गतेदेखि  राष्ट्रिय वाणिज्य बैंकको सिंहदरबार शाखामा उपचार कोष खाता सञ्चालनमा ल्याएको हो ।