स्वास्थ्य तथा जनसङ्ख्या मन्त्री भानुभक्त ढकालले सरकारले कोरोना भाइरस (कोभिड–१९)को पीसीआर प्रविधिबाट परीक्षणलाई प्राथमिकता राखेको बताएका छन् ।

मन्त्रालयमा आज आयोजित सङ्घीय संसद्का सांसदसँग मन्त्रालयको नीति तथा कार्यक्रम सुझाव सङ्कलनका क्रममा उनले पीसीआर परीक्षणका लागि पर्याप्त किट भएको जानकारी दिए ।

उनका अनुसार अहिले सरकारसँग पर्याप्तमात्रामा पीसीआर किट रहेकोे छ । २० हजार चीन र ३० हजार स्विट्जरल्याण्ड सरकारले किट उपलब्ध गराएको छ ।  

मन्त्री ढकालले कोभिड–१९ बढी जोखिम देखिएको उदयपुर, पर्सा र नेपालगञ्जमा मन्त्रालयबाट विशेष टोली परिचालन समेत  भएको जानकारी दिए ।

उनले हिजो सांसद्को परीक्षणलाई लिएर सञ्चारमाध्यमा गलत प्रचार भएको बताए ।

'सञ्चारमाध्यमले जनताको परीक्षण नगरेर सांसदको पीसीआर विधिबाट परीक्षण गरेको भनेर प्रकाशित गरे', उनले भने, ‘तर त्यसो होइन । सांसदमा हिजो २१२ जनाको तथा अन्य सुरक्षाकर्मी र कर्मचारीको १७९ गरिएको छ । त्यहाँ सांसद जतिकै अन्यको पनि परीक्षण गरिएको छ ।'

उनले प्रदेशमा समान रुपले परीक्षण किट पठाइएको भन्दै बढी संवेदनशील ठाउँमा केन्द्रबाट नै विशेष टोली खटाइएको बताए ।

सो कार्यक्रममा सांसद जुलीकुमारी महतोले प्रदेश नं २ मा पर्याप्तमात्रामा परीक्षण गर्नुपर्ने बताए । उनले सरकारले नयाँ कार्यक्रमभन्दा पहिलेको कार्यक्रमलाई निरन्तरता दिनुपर्ने बताइन् ।

सांसद समिना हुसेनले पीसीआर परीक्षण कम भएकाले बढाउनुपर्ने बताइन् ।

सांसद सुरेशचन्द्र दासले भारतमा अलपत्र परेका नेपालीलाई परीक्षण गरेर क्वारेन्टाइनमा राखेर नेपाल भित्र्याउनुपर्ने बताए ।

सांसद सरिताकुमारी गिरी र चाँदतारा कुमारीले टेकुस्थित सरुवा रोग अस्पतालले मुलुकका बिरामीलाई थेग्न नसक्ने भन्दै सातवटै प्रदेशमा सरुवा अस्पताल निर्माण गर्नुपर्ने बताए ।

सांसद लीला श्रेष्ठले स्वास्थ्यका क्षेत्रमा अल्पकालीन र दीर्घकालीन योजना बनाउनुपर्ने बताइन् ।

सांसद तुलसाकुमारी दाहालले एक परिवार एक सदस्यलाई पीसीआर विधिबाट कोभिड–१९ परीक्षण गर्नुपर्ने बताइन् ।