काठमाडौं उपत्यकाभित्रका कृषकले उत्पादन गरेका कृषि उपजलाई बजारीकरणका लागि कृषि ज्ञान केन्द्र ललितपुरले स्थानीय तहसँग समन्वय गर्ने भएको छ । 

ललितपुरमा आइतबार आयोजित ‘कृषि बजार र उपत्यकामा यसको बैकल्पिक सम्भावना’ विषय कृषि उद्यमीसँगको अन्तक्र्रियामा कृषि बजारीकरणका लागि ज्ञान केन्द्रले स्थानीय तहसँग समन्वय गर्ने निर्णय भएको हो । 

अन्तक्र्रियामा बैकल्पिक बजारहरु मार्फत कृषकका समस्या सम्बोधन गर्न प्रयास गर्ने समेत निर्णय भएको छ । कार्यक्रममा कृषि ज्ञान केन्द्रका प्रमख निर्मल गदालले कृषि ज्ञान केन्द्रले आगामी दिनमा प्रदेश अन्तर्गतका उत्पादन क्षेत्रबीच समन्वय गरी विविधायुक्त तरकारी उपजको बजारीकरणका लागि कृषकलाई सघाउने बताए । 

उनले कृषि उद्यमी परिचयपत्रलाई निरन्तरता दिइने, कृषि उपजका ढुवानीमा परेका बाधा व्यवधानलाई ज्ञान केन्द्रले आवश्यक सहजिकरण गर्ने समेत बताए । 

उनले भने, ‘कोभिड –१९ ले कृषिमा पारेको प्रभावबारे अध्ययान गर्न, नीतिगत तहमा पारेको प्रभावबारेमा पनि कृषि ज्ञान केन्द्रले अध्ययन गर्नेछ ।’

यस्तै विषादी परीक्षणलाई बिस्तार गर्दै ज्ञान केन्द्रले थप कार्यक्रम अगाडी बढाउने, कृषि उद्यमीहरु(बजार लगायत अन्यकर्ताहरु) लाई सूचिकृत गरी तथ्यांक आवधिक गर्ने समेत प्रमुख गदालले बताए । उनले कृषि ऋण र अनुदानमा नयाँ प्याकेज ल्याउन लागिएको समेत जानकारी गराए । 

८४ हजार मेट्रिक टन बर्खे तरकारी उपत्यकामा 
कृषि ज्ञान केन्द्रले आगामी चार महिनाको अवधिमा ८४ हजार मेट्रिक टन तरकारी बजारमा आउने बताएको छ । 

उक्त तरकारी काठमाडौं, ललितपुर र भक्तपुरमा उत्पादन हुनेछ । ज्ञान केन्द्रका प्रमुख गदालले जेठ, असार, साउन र भदा गरी चार महिनाको अवधिमा ६३ करोड बराबरको ८४ हजार १ सय ६८ टन तरकारी बजारमा आउने बताए । 
यी तरकारी खपतका लागि बैकल्पिक बजारको आवश्यक रहेको भन्दै उनले त्यसतर्फ किसानले ध्यान दिनुपर्ने र ज्ञान केन्द्रले पनि समन्वय गर्ने बताए । 
 

‘किसानलाई बजारसम्म पुग्नै समस्या’

अन्तक्र्रियामा सहभागि कृषि उद्यमीहरुले किसानलाई बजारसम्म पुग्नै समस्या हुने गरेको बताएका छन् । 

कृषि उद्यमी मनोज आचार्यले किसानलाई भएका बजारमा पनि लकडाउनका कारण पुग्न समस्या भएको गुनासो गरे । 

उनले भने, ‘कृषि उपज लिएर डोर टु डोर पुग्न समस्या छ । पास, परिचयपत्र छैन । ढुवानीमा समस्या भएको छ ।’ उनले आगामी  दिनमा अनलाईन मार्केटिङको क्षेत्र बढाउनुपर्ने बताए । 

कृषि उद्यमी एवं अर्गानिक ट्रेड सेन्टर प्रालिका प्रवन्ध निर्देशक कृष्ण न्यौपानेले उपत्यकामा नै तरकारी उत्पादन हुँदा पनि प्रशासनकै सुरक्षामा भारतबाट तरकारी आयत हुने गरेको बताए । 

मेट्रो तरकारी अनलाईनका सञ्चालक अनिल बस्नेतले लकडाउनका समयमा  १४ गुणा बढी अनलाईन मार्फत तरकारी विक्रि हुने गरेको बताए । 

उनले कृषि बजारीकरणका लागि तरकारी बेच्ने ठेलागाडा, किनारा पसलसँग पनि समन्वय गर्नुपर्ने बताए । 

कृषि उद्यमी रामकृष्ण भण्डारीले पछिल्लो समय बजारीकरणको समस्या भएको भन्दै राज्यले कृषि अनुदान भन्दा सहज रुपमा कृषि ऋणको व्यवस्था गर्नुपर्नेमा जोड दिए ।