‘कोभिड–१९ का रोगीहरू अस्पताल आउँदा जीवन अन्त्य हुन लागेको सोच राख्छन्,’ मनोवैज्ञानिक टोम्मासो स्पेरान्जा बताउँछन् ।

रोमको स्पाल्लान्जानी सरुवा रोग अस्पतालले कोरोनाभाइरस संकटको उपचारमा अग्रणी भूमिका निर्वाह गरिरहेको छ । कोरोनाका कारण देशमा ३० हजार ५०० भन्दा बढीको ज्यान गइसकेको छ । 

तर इटलीमा कोभिड–१९ को संक्रमण शुरू भएदेखि अर्को एउटा संकट पनि देखिएको छ । 

मृत्युको डर, चिन्ता, अवसाद, क्रोध, झस्यांग हुने समस्या र अरू मरेर आफू बाँचेको अपराधबोध लगायतका लक्षण मानिसहरूमा देखिन थालेको छ । प्राकृतिक विपत र युद्धमा बाँचेकाहरूलाई यी सबैले समस्या दिने गरेका छन् । 

‘रोगीहरूलाई तत्कालै सघन उपचार इकाइमा भर्ना गर्नु नपर्ने हो भने शुरूमा उनीहरूको डर हटाउन थेरापी सेसन दिने गरिएको छ । हामी उनीहरूलाई आशाको सञ्चार गराउन प्रयास गर्छौं अनि उनीहरू एक्लो छैनन् भन्छौं र अस्पतालका कर्मचारीलाई विश्वास गर्न प्रेरित गर्छौं,’ डा स्पेरान्जाले भने । 

मनोवैज्ञानिकहरूको टोलीले कोभिड–१९ का रोगीहरूसँग दिनहुँ सम्पर्क राख्छन् । 

‘कहिलेकाहीँ रोगीभन्दा बढी उनीहरूका परिवारले कष्ट भोगिरहेका हुन्छन् । उनीहरूले रोगीलाई भेट्न आउन पाउँदैनन्, कुर्नुको विकल्प हुन्न । भावनात्मक रूपमा यसले थकान दिन्छ । हामी उनीहरूलाई खबर दिन्छौं र भिडियो कलमार्फत सम्पर्क गराउँछौं । हामी उनीहरूको असल साथी बन्छौं ।’

मनोवैज्ञानिकहरूले सार्वजनिक, निजी र गैरसरकारी क्षेत्रसँग सहकार्य गरेर निःशुल्क रूपमा मानिसक रोगको उपचार गरिरहेका छन् । 

बीबीसीबाट