ताजा अध्ययनहरूले कोरोनाभाइरस महाव्याधि लामो समयसम्म कायम रहने संकेत दिएका छन् । 

अनुसन्धाताहरूले संसारभरि एक चरणको सामाजिक दूरीले नपुग्ने बताएका छन् । आगामी दुई वर्षका लागि सुरक्षाको प्रबन्ध गर्नुपर्ने हुन्छ । 

संक्रमणको भविष्य भौगोलिक स्थिति, मौसम, रोकथाम नीति, सामाजिक दूरी र हर्ड इम्युनिटी लगायतका फरक फरक कुरामा निर्भर रहने विज्ञहरूको अनुमान छ । त्यसैले निकट भविष्यमा संक्रमितहरूको संख्या घट्यो भन्दैमा ढुक्कले बस्न सकिने स्थिति हुँदैन । पछि पनि संक्रमण घरिघरि आउनेछ अनि अहिलेको भन्दा बढी संख्यामा संक्रमण देखिन सक्छ । 

अमेरिकाको हार्वर्ड विश्वविद्यालयको स्कूल अफ पब्लिक हेल्थका महाव्याधि विशेषज्ञ डा मार्क लिपसिचका अनुसार, निकट भविष्यमा संक्रमण रोकिन मुश्किल छ । 

मिनेसोटा विश्वविद्यालय र हार्वर्ड विश्वविद्यालयमा भएमा छुट्टाछुट्टै अध्ययनमा आगामी महिनाहरूमा महाव्याधिका सम्भावित स्वरूप प्रस्तुत गरिएका छन् । 

सन् २०२२ सम्म संक्रमणको उतारचढाव भइरहने अध्ययनमा लेखिएको छ । 

अहिलेको लहर कमजोर भएपछि जाडो महिनामा संक्रमण फेरि बढ्नेछ । अनि दुई वर्षसम्म यो ससाना लहरहरूमा गरी आइरहनेछ । यसलाई फल पीक मोडकल भनिन्छ । सन् १९१८–१९ मा आएको स्पेनिस फ्लु महामारीमा पनि यही स्थिति देखिएको थियो । 

त्यसैले आगामी दुई वर्षका लागि मानिसहरूले कोभिड–१९ संक्रमणका लागि तयार रहनुपर्ने विशेषज्ञहरूको मत छ । यस क्रममा विभिन्न भौगोलिक क्षेत्रमा हटस्पट आइरहनेछन् । 

हर्ड इम्युनिटी बन्न लामो समय लाग्ने अनि खोप बन्न पनि प्रतीक्षा गर्नुपर्ने भएकाले सामाजिक दूरी नै यसबाट बच्ने उत्तम उपाय भएको विशेषज्ञहरू बताउँछन् । सामाजिक दूरी हटाउनेबित्तिकै संक्रमण बढ्ने उनीहरूको भनाइ छ ।