पार्टीभित्रको विवाद शक्ति संघर्ष हो : मुख्यमन्त्री पोखरेल

फाइल फोटो

नेपाल कम्युनिस्ट पार्टी (नेकपा) स्थायी कमिटी सदस्य तथा प्रदेश ५ सरकारका मुख्यमन्त्री शंकर पोखरेलले पछिल्ला दिनमा नेतृत्व आपसी अन्तरसंवादतर्फ केन्द्रित हुँदा पार्टीभित्रका विवाद कम हुँदै गएको बताएका छन् ।

नेपाल कम्युनिस्ट पार्टीका तत्कालीन महासचिव जननेता मदन भण्डारी र कुशल संगठक जीवराज आश्रितको २७ औं स्मृति दिवसका अवसरमा शनिवार बुटवलमा आयोजित स्मृति कार्यक्रममा मुख्यमन्त्री पोखरेलले पार्टी एकताको सफलता हरेक नेता कार्यकर्ताले सोच्नुपर्ने विषय भएको बताए ।


Advertisement

‘इतिहासप्रति गर्व गरौं, इतिहासको भारी बोकेर वर्तमानलाई प्रभावित गर्ने काम नगरौं,’ उनले भने, ‘हाम्रो एकता समाजवाद निर्माण, मुलुकको समृद्धि र जनताको दीगो स्तरमा रुपान्तरणका लागि हो ।’  उनले पार्टीभित्र वर्तमानमा देखिएको विवाद वैचारिक र राजनीतिक नभएर शक्ति संघर्ष भएको बताउँदै यसलाई कम्युनिस्ट आन्दोलनमा कुनै उचित मुद्दाका रुपमा लिनु नहुने स्पष्ट पारे । उनले भने, ‘शक्तिलाई व्यवस्थापन वा संयोजन गर्ने हो, त्यसको प्राप्तिका लागि अनावश्यक द्वन्द्व आन्दोलनको भविष्यका लागि हानिकारक हुन्छ भन्ने सबैले गहिरो गरी महसूस गर्नु जरुरी छ ।’ 

मुख्यमन्त्री पोखरेलले नेपाली समाजमा प्रतिस्पर्धाका माध्यमबाट नेपालको कम्युनिस्ट आन्दोलनलाई स्थापित गर्ने तथा संवैधानिक प्रतिस्पर्धाका माध्यमबाट समाजवाद निर्माण गर्ने नेकपाले लिएको लक्ष्यलाई कसरी स्थापित गर्न सकिन्छ भन्ने विषयमा भण्डारीका विचार अत्यन्तै सान्दर्भिक र सार्थक रहेको बताए । उनले नेताहरू कुनै रहस्यमय अलौकिक कथाका पात्र जस्तो नभएर निरन्तर कार्यकर्ता र जनताबाट अनुमोदित हुनुपर्ने र पार्टी कमिटी प्रणाली शृंखलाबद्ध हुन सके मात्र समाजलाई रुपान्तरण गर्न सक्ने पार्टी निर्माण गर्न सकिनेमा जोड दिए ।


Advertisement

कमेन्ट गर्नुहोस्