संसद्‍मा प्रदीप गिरीले भने– अमरसिंह थापाले जस्तो खुकुरी पछि चम्काउँला अहिले जनता बचाऔं !

विश्वयुद्धअघिका बेलायती प्रधानमन्त्रीको नाम लिँदै प्रदीप गिरीले भने– अमरसिंह थापालेजस्तो खुकुरीपछि चम्काउँला अहिले जनता बचाऊ !

नेपाली कांग्रेसका सांसद एवं केन्द्रीय सदस्य प्रदीप गिरीले आफ्नो ३० वर्षे संसदीय इतिहासमा सरकरका नीति तथा कार्यक्रमले पहिलोपटक सर्वाधिक निराश बनाएको बताएका छन्  ।


Advertisement

राष्ट्रपतिले संसद्‍मा पेश गरेका सरकारका नीति तथा कार्यक्रम किमकर्तव्यविमुढताको ठोस प्रमाण भएको उनले आरोप लगाए । 

सरकारको नीति तथा कार्यक्रममाथि प्रतिनिधि सभामा आइतवारको छलफलमा भाग लिँदै नेता गिरीले अनिश्चित बन्दै गइरहेको लकडाउनका कारण मानिस रोगभन्दा भोकले मर्ने अव्स्था आउँदा पनि सरकारले गरीबीलाई सम्बोधन गर्ने कार्यक्रम नल्याएको भन्दै असन्तुष्टि व्यक्त गरेका हुन् ।


Advertisement

‘नशा लागेको हो ? यो दस्तावेजमा मानवजातिको इतिहासमा आज अघि कहिल्यै नभएको संकट आइपरेको छ । कार्यक्रममा भनिएको छ, कसैलाई भोकै रहन दिन्नौं । म चेतावनी दिन चाहन्छु– रोगभन्दा भोकले नै मर्ने अवस्था आइसक्यो,’ गिरीले भने, ‘भनिन्छ, रक्सीको नशा खाएपछि, पैसाको नशा पाएपछि र सत्ताको नशा गाएपछि लाग्दो रहेछ, ओहो तपाईं कति ठूलो मान्छे भन्दिएपछि हुँदो रहेछ । मानवताको इतिहासमा यति ठूलो संकट आएको छ, कार्यक्रममा मात्र भनिएको छ– गरिनेछ । यस्तै हो भने केही दिनपछि मरिनेछ भनेर लेख्नुपर्छ ।’ 

उनले नेपाल सरकारको अकर्मण्यता दोस्रो विश्वयुद्ध पहिलेको बेलायती प्रधानमन्त्रीसँग तुलना गरे ।

‘यो सरकारको अकर्मण्या त्यस्तै छ, जस्तो दोस्रो विश्वयुद्धको समयमा प्रधानमन्त्री नेबिल चेम्बरलाइनलाई हटाउन उनकै पार्टीका लर्ड एमेरी र विन्स्टन चर्चिलले उठेर भन्नुपएको थियो– इनअफ, इनअफ । हामीमाथि दया गर त्यो कुर्सी छाडिदेऊ,’ सांसद गिरीले भने, ‘प्रधानमन्त्रीको तथाकथित देशभक्तिमा मलाई शंका छैन, उहाँको वचन र राष्ट्रवादका अनुसार जनसेना बनाएर प्रचण्डसँग हातमा हात मिलाएर चीन र भारतलाई सबक सिकाउन बेर छैन । तर आज समस्या छ भोकमरीको, जनता बाँचेर बलियाबांगा भए भने अमरसिंह थापा जसरी खुकुरी चम्काएर सतलज पुगेका थिए, त्यसै गरौंला अहिले विदेशमा अलपत्रलाई ल्याउन आँट देखाउनुस् ।’

उनले राष्ट्रपतिलाई सबैको साझा बन्न सुझाव दिए । ‘सरकारले समस्या समाधान गर्दैन भने ठाउँ छाडोस्, म द्वितिय विश्वयुद्धको चर्चिल बोल्दैछु ।

अन्यथा प्रधानमन्त्रीले सीमामा र विदेशी भूमिमा अलपत्रलाई भन्न सक्नुपर्छ, मसँग दिनका लागि केही छैन । हामी केहीदिन दुःख पाएर बसौं, प्रधानमन्त्रीले झुठो ललिपप दिने होइन ।’

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्