बाराको करैयामाई गाउँपालिकाका १ जना पत्रकारमा कोरोना भाइरस संक्रमण देखिएको छ ।

गाउँपालिकाका अध्यक्ष भुनेश्वर धामीले सोमवार बिहान संक्रमण पुष्टि भएका व्यक्ति पत्रकार भएको बताए ।

स्वास्थ्य तथा जनसंख्या मन्त्रालयले सोमवार बिहान बाराको करैयामाई गाउँपालिकामा संक्रमण देखिएको पुष्टि गरेको छ । संक्रमित ३८ वर्षीय पत्रकार घरमा बस्दै आएका थिए ।

‘उहाँ आफ्ना दाजुभाइको एउटा मुद्दालाई लिएर जिल्ला प्रहरी कार्यालय बाराको मुद्दा फाँटमा लगातार जानुभएको थियो,’ अध्यक्ष धामीले भने, ‘त्यहाँ मुद्दा फाँटमा काम गर्ने प्रहरी पनि कोरोना संक्रमित यसअघि नै पुष्टि भएकाले उहाँमा त्यतैबाट सर्‍यो वा अन्य स्थानमा सर्‍यो भन्ने कुराको पुष्टि हुन बाँकी छ ।’

वडाध्यक्ष उमेश चौधरीका अनुसार संक्रमित पत्रकार कलैयाको संस्कार एफएममा कार्यरत छन् । ‘उहाँ पत्रकार भएका कारण सधैं बाहिर आऊजाऊ गर्ने गर्नुहुन्थ्यो, त्यसैले संक्रमण भएको हुनसक्छ,’ वडाध्यक्ष चौधरीले भने, ‘उहाँ आफ्नो गाउँ तेतरीयामा नै बस्दै आउनुभएको छ ।’

संक्रमित ती पत्रकारले पनि आफूमा कोरोना संक्रमण जानकारी बाराका प्रमुख जिल्ला अधिकारीबाट थाहा पाएको बताए । ‘अब कलैया पुगेर उपचारका लागि आइसोलेसनमा जान्छु,’ संक्रमित पत्रकारले भने ।

संक्रमित पत्रकारमा पहिलेदेखि नै कोरोना संक्रमणको आशंका गरिएको थियो । केही दिन अघिदेखि नै कोरोना संक्रमणको लक्षण देखापरेको ती पत्रकारले बताए । ‘रुघाखोकी हुने, घाँटीमा कफ जमेको जस्तो केही बसेको, अड्किएको अनुभव भइरहने जस्ता लक्षण देखिएको थियो । लक्षण देखा परेपछि आफू गाउँपालिकाको वडास्थित स्वास्थ्य चौकीमा गएर जाँच गराउँदा केही पनि होइन, सर्दी हो ठीक भइहाल्छ भनेर औषधि दिएर फिर्ता पठाइदिए,’ संक्रमित पत्रकारले लोकान्तरसँग भने ।

केही दिनपछि जेठ २ गते कलैयामा पत्रकारको स्वाब संकलन हुँदा आफूले पनि जाँच गराएको उनले बताए । सोमवार कोरोना पोजेटिभ पाइएको कुरा पुष्टि भएको सुन्दा अचम्म नलागेको उनले बताए । ‘म जिल्ला प्रहरी कार्यालय कलैयामा पटक–पटक मुद्दा फाँटमा गएको थिएँ,’ उनले भने, ‘त्यहाँ मुद्दा फाँटमा काम गर्ने प्रहरी हवल्दारमा पनि संक्रमण भएको भनेर केही दिनअघि मात्र पुष्टि भएकाले उनै व्यक्तिबाट सरेको हो कि जस्तो लागेको छ । ’

उनी पत्नी, २ छोरा र २ छोरी साथ बस्दै आएका थिए । संस्कार एफएममा समाचार पढ्ने, कार्यक्रम सञ्चालन गर्ने तथा अन्तर्वार्ता लिने काम गर्दै आएको उनले बताए ।