सिसडोलवासीको कोभिड–१९ परीक्षण हुने भएपछि काठमाडौँ उपत्यकाको नियमित फोहोर विसर्जन हुने भएको छ। सिसडोलवासीले कारोना परीक्षणको माग राख्दै ककनी गाउँपालिकाले सोमबारदेखि लागू हुने गरी एम्बुलेन्स बाहेकका सवारी आवतजावतमा रोक लगाएपछि कुनै पनि फोहरका गाडी काठमाडौँ उपत्यकाबाट सिसडोल जान पाएका थिएनन्।  

काठमाडौँ महानगरपालिकाका प्रमुख विद्या विद्यासुन्दर शाक्यको नेतृत्वमा आज ककनी गाउँपालिका जनप्रतिनिधिसहित बसेको बैठकले तत्कालका लागि यो समस्या समाधान गर्ने सहमति गरेको हो। ककनी गाउँपालिकाका जनप्रतिनिधि र स्थानीयको मागअनुसार सिसडोलवासीमा कोरोना सङ्क्रमण भए–नभएको पुष्टिका लागि काठमाडौँ महानगरपालिकाको नेतृत्व र स्वास्थ्य विभागको सहयोगमा  परीक्षण गर्ने सहमति भएको छ। 

शाक्यले मंगलबार नै स्वास्थ्य विभागको टोलीसहित सिसडोल पुगेर आरडिटी र पिसिआर विधिबाट कोरोना भाइरस परीक्षण गरिने जानकारी दिए। उपत्यकाको फोहोरा छोपेर सिसडोल लैजाने सहमति भयो। प्रमुख शाक्यले भने, ‘सहमतिअनुसार बेलुका ८ बजेदेखि बिहान ६ बजेसम्म फोहोर विसर्जन गरिसक्नुपर्ने छ।’
 
ककनी गाउँपालिकाका प्रमुख मानबहादुर लामाले सिसडोलवासीले कोरोना सङ्क्रमणको डर बढिरहेका बेला स्वास्थ्य परीक्षणको माग गरेको र त्यो माग पूरा भएकाले हालको नियमित फोहर विसर्जन हुने जानकारी दिए। महानगरको वातावरण विभाग प्रमुख हरि श्रेष्ठका अनुसार फोहोर विसर्जन स्थल आसपासका बढी प्रभावित कम्तीमा ३०० जनाको परीक्षण गर्ने तयारी कामपाको रहको छ।