सुदूरपश्चिम प्रदेशमा ५ जना कोरोना संक्रमित निको भइ घर फर्केको केही सातापछि पुनः शुक्रबार एकैचोटी ५ जनामा संक्रमण पुष्टि भएको छ । कैलालीका ३, बैतडी १ र डडेल्धुराका १ जनामा गरी ५ जनामा कोरोना संक्रमण पुष्टि भएको हो ।

धनगढीस्थित प्रयोगशालामा भएको परिक्षण रिपार्ट अनुसार संक्रमण देखिएको सेती प्रादेशिक अस्पतालले जनाएको छ । अस्पतालका सूचना अधिकारी दिलिप श्रेष्ठका अनुसार कैलालीका तीनै जना संक्रमित जानकी गाउँपालिकाका रहेका छन् । गाउँपालिका वडा ४ र ७ का १९, २३ र २६ वर्षीय युवकमा कोरोना देखिएको हो ।

उनीहरु इटहरी, बाँके र भारतबाट लुकीछिपी फर्किएको खुलेको छ । वडा नम्वर ४ का संक्रमित जेठ १ गते कालाकुण्डा नाका हुँदै जानकी गाउँपालिका पुगेका थिए । उनी भारतको महाराष्ट्रबाट फर्किएको जनाइएको छ । उनीहरु तीनै जनालाई सरस्वती माध्यमिक विद्यालयको क्वारेन्टाइनमा राखिएको थियो ।

भारतबाट फर्किएका युवकलाई सिधै क्वारेन्टाइनमा राखिएको थियो भने अन्य २ जना गाउँपालिकाले घरबाटै प्रहरी लगाएर क्वारेन्टाइनमा ल्याएको थियो ।

जिप्रका बैतडी सील

थुनुवामा नै कोरोना संक्रमण देखिएपछि जिल्ला प्रहरी कार्यालय बैतडी सील गरिएको छ ।

शिवनाथ गाउँपालिका १ का २२ वर्षीय संक्रमित युवक कर्तव्य ज्यान मुद्धामा प्रहरी कार्यालय बैतडीको हिरासतमा थिए । उनीमा नै संक्रमण पुष्टि भएपछि जिल्ला प्रहरी कार्यालय बैतडी सील गरिएको हो । बैतडीका प्रमुख नायब उपरीक्षक डिल्लीनारायण पाण्डेयले थुनुवामा रहेका युवकका कोरोना पुष्टि भएपछि कार्यालय सील गरिएको बताए ।

संक्रमितको सम्पर्कमा रहेका सबैको परीक्षण गर्ने तयारी गरिएको छ । संक्रमित यूवा वैशाख १५ गते कर्तव्य ज्यानको मुद्धामा पक्राउ परेका थिए । भने चैत ६ गते उनी भारतबाट फर्केको प्रहरीले जनाएको छ । त्यस्तै, डडेलधुराका संक्रमित पुरुष सदरमुकामस्थित एक सरकारी कार्यालयमा कार्यरत रहेका छन् ।

हाल उनी सदरमुकाममै रहेको र थप बुझ्ने काम भैरहेको प्रहरीले जनाएको छ । कोरोना संक्रमित पाँचै जनालाई धनगढीस्थित सेती प्रादेशिक अस्पतालमा ल्याउने तयारी भैरहेको जनाइएको छ । यो सँगै सुदूरपश्चिममा संक्रमितको सङख्या १० पुगेको छ ।