बलिउड अभिनेत्री अनुष्का शर्माको पहिलो वेब सिरीज पाताल लोकविरुद्ध भारतमा रहेको गोर्खा समुदायले उजुरी दर्ता गरेको छ । 

त्यहाँको राष्ट्रिय मानवअधिकार आयोगमा गोर्खा समुदायले अनुष्काविरुद्ध उजुरी दर्ता गर्दै उक्त वेब सिरीजको दोस्रो एपिसोडमा नेपालीभाषी महिलाका लागि अपमानजनक तथा अपहेलनात्मक भाषा प्रयोग गरिएको जानकारी दिइएको छ । 

यससँगै लयर गिल्ड मेम्बरका सदस्य अधिवक्ता वीरेन सिंह गुरुङले वेब सिरीजविरुद्ध कानूनी नोटिस पठाएका छन् । अघिल्लो सोमवार पठाइएको नोटसमा सुदीप शर्माद्वारा लेखिएको सिरीजमा जातिसूचक शब्द प्रयोग गरिएको र त्यसले गोर्खा समुदायको अपमान गरेको उल्लेख छ । 

वीरेनले भने, ‘पाताल लोकको दोस्रो एपिसोडमा सोधपुछ गर्दै गर्दा महिला प्रहरीले नेपाली पात्रविरुद्ध जातिवादी गालीगलौज गरेकी छन् । ‘नेपाली’ शब्द मात्र प्रयोग गरेको भए पुग्थ्यो तर त्यसपछि अत्यन्तै आपत्तिजनक शब्द प्रयोग गरिएको छ जसलाई स्वीकार गर्न सकिँदैन । अनुष्का शर्मा यस शोकी निर्माता भएकाले उनलाई नोटिस पठाइएको हो । अनुष्काले यसमा कुनै प्रतिक्रिया दिएकी छैनन् । जवाफ आएन भने लिगल टीमले यसलाई अघि बढाउनेछ ।’ 

भारतीय गोर्खा परिसंघको युवा शाखा भारतीय युवा गोर्खा परिसंघले वेब सिरीजविरुद्ध अन्लाइन अभियान चलाउँदै दोस्रो एपिसोडमा नेपालीभाषी महिलालाई निर्माताले अपमान गरेको आरोप लगाएको छ । 

‘यो प्रतिगामी मात्र नभई उत्तरपूर्वका मानिस, विशेषगरी गोर्खाहरूको जातिवादी स्टिरियोटाइपिङ हो,’ उनीहरूको पोस्टमा लेखिएको छ । ‘हामीहरू यसलाई कडा शब्दमा भर्त्सना गर्छौं र यसलाई तत्कालै हटाउन माग गर्छौं ।

समुदायलाई स्टिरियोटाइप गरेको हामी पचाउन सक्दैनौं र सिर्जनात्मक स्वतन्त्रताको नाममा जातिवादी आक्रमणलाई स्वीकार पनि गर्दैनौं,’ उनीहरूले लेखेका छन् ।

उता गुर्जर समुदायका नेता नन्दकिशोर गुर्जरले आफ्नो तस्वीर अनुमति नलिइकन वेब सिरीजमा प्रयोग गरिएको र गुर्जर समुदायलाई डाँका देखाइएको भन्दै अनुष्का शर्माविरुद्ध तत्काल कारवाही गर्न माग गरेका छन् ।