क्रियशनको पहल र कोकाकोला नेपालको सहयोगमा नेपालमा वेस्ट वर्कर (सफाइकर्मी) लाई सुरक्षा र जीविकोपार्जनका लागि राहत दिन सुरु गरिएको छ।

नेपालमा कोकाकोलासँगै क्रियशनले वेस्ट वर्कर इमरजेन्सी रिलिफ प्रोजेक्ट (डब्लूडब्लूईआरपी) नामको संयुक्त पहलमा घोषणा गरिएकाे कार्यक्रमबाट जोखिममा रहेका वेस्ट वर्करलाई राहत दिन थालिएकाे हाे। यसबाट जागरूकता, सुरक्षा सामग्रीहरू र राहत सामग्रीहरू प्रदान गर्न थालिएकाे छ।

यो परियोजना कोकाकोलाको कोरोनाविरूद्ध लड्न ८ करोड सहयोग गर्ने प्रारम्भिक प्रतिबद्धताको एक हिस्सा रहेको जारी विज्ञप्तिमा भनिएको छ।

यस परियोजनाबाट काठमाडौंको बुढानिलकण्ठस्थित वुमन फर ह्युमन राइटमा कार्यक्रम आयोजना गरिएको थियो। जहाँ १ सय ५० वेस्ट वर्करलाई सुरक्षा सम्बन्धी जागरूकतासँगै राहत सामग्री वितरण गरिएको थियो।

‘हालसम्म ४ राहत कार्यक्ररू सफलतापूर्वक सञ्चालन भइसकेका छन् जसले ४६० वेस्ट वर्करहरूलाई प्रत्यक्ष लाभान्वित गरेको छ। नीहरूलाई सुरक्षा र जागरूकता कार्यक्रम, खाद्यान्न राहत प्याकेज र महिला लाभार्थीहरूको लागि डिग्निटी किट प्रदान गरिएको थियो जसमा प्राथमिक आवश्यकता सुनिश्चित गर्न र उनीहरूको आजीविका सुरक्षाको लागि वातावरण मैत्री र पुनःप्रयोगयोग्य सेनिटरी प्याडको साथसाथै व्यक्तिगत स्वच्छता सामग्रीहरू जस्तै साबुन, डिटर्जेन्ट, पञ्जा र आवश्यक औषधिहरू प्रदान गरिएको थियो,’ विज्ञप्तिमा भनिएको छ।

मे २५ तारिखको राहत कार्यक्रममा १ सयजना अग्रपङ्गतीमा रहेका वेस्ट वर्करहरुलाई रक्षात्मक जम्पसुटहरू र सुरक्षा सामग्रीहरू प्रदान गरिने जनाइएको छ।

संकटको वर्तमान अवस्थामा ३ हजार २ सय वेस्ट वर्कर र उनीहरुका परिवारहरुसम्म पुग्दै उनीहरुका सुरक्षा र जीविकोपार्जन सुनिश्चित गर्ने योजना रहेको  क्रियशनका अध्यक्ष आनन्द मिश्राले बताए। परियोजना काठमाडौं, किर्तिपुर, ललितपुर, भक्तपुर, चितवन, लहान, सप्तरी र सिराहाका विभिन्न नगरपालिकाहरूमा सञ्चालन गरिनेछ।

वुमन फर ह्युमन राइटकी स्थापक लिली थापाले वेस्ट वर्कर पनि अन्य व्यवसायहरु जत्तिकै अग्रपङ्गतीमा रहेको बताइन्।

कोकाकोला नेपालका कन्ट्री डाइरेक्टर अम्बुज सिंहले अग्रपङ्गतीमा काम गरिरहेका र महामारीका कारण जोखिममा रहेका वेस्ट वर्करलाई समस्या भइरहेकाले यो कार्यक्रम थालिएको बताए।