संसद्को कार्यसूचीबाट हट्यो संविधान संशोधन विधेयक

नयाँ नक्सा अनुसार संविधानको अनुसूचीमा रहेको नेपालको निशान छाप बदल्नको लागि सरकारले संसद सचिवालयमा दर्ता गरेको संविधान संशोधन विधेयक टेबुल गर्ने प्रतिनिधि सभाले यसअघि तय गरेको कार्यसूची अन्तिम समयमा आएर हटाएको छ ।

संघीय संसद सचिवालयले मंगलवार प्रकाशित गरेको बुधवारको सम्भावित कार्यसूचीमा कानून न्याय तथा संसदीय व्यवस्थामन्त्री डा. शिवमाया तुम्हाबाम्फेले विधेयक पेश गर्ने कार्यक्रम थियो । दिउसो २ बजे बस्ने बैठकमा नेपालको संविधान (दोस्रो संशोधन विधेयक) २०७७ माथि अनुमति माग्ने प्रस्ताव पेश गर्ने सम्भावित कार्यसूची थियो ।

आज प्रकाशित कार्यसूचीमा संविधान संशोधन विधेयक टेबुल गर्ने कार्यक्रम हटाइएको छ । थप तयारीका लागि कार्यसूचीबाट सो विषय हटाइएको सचिवालय स्रोतले बतायो ।

‘यसअघि पनि यस्तो हुन्थ्यो, हिजो प्रकाशित गरेको सम्भावित कार्यसूची थियो, संविधान संशोधन विधेयक अर्को दिनको कार्यसूचीमा राखिन्छ,’ सचिवालयका एक अधिकारीले भने ।

संविधान संशोधन विधेयक सर्वसम्मत पारित गराउने प्रयासस्वरुप प्रधानमन्त्री केपी शर्मा ओलीले मंगलवार सर्वदलीय बैठक राखेका थिए । जेठ ६ गते सरकारका नीति तथा कार्यक्रम माथिको छलफलमा सांसदले उठाएका प्रश्नको जवाफ दिने क्रममा ओलीले संविधान संशोधन विधेयक पारित भएको दिन मुलुकमा दीपावली हुने बताएका थिए ।

सरकारले गत शुक्रवार संसद सचिवालयमा संविधान संशोधन विधेयक दर्ता गराएको थियो । भारतले अतिक्रमण गरेको कालापानी, लिपुलेक र लिम्पियाधुरालाई नेपालको नक्सामा समेटी सरकारले गत जेठ ५ गते नयाँ नक्सा प्रकाशित गरेको थियो ।

भोलि संसदमा नयाँ आर्थिक वर्षको बजेट पेश हुने भएकोले संविधान संशोधन विधेयकका थप प्रक्रिया १६ गतेपछि हुने संसद सचिवालयले जनाएको छ । आइतवार बसेको कार्यव्यवस्था परामर्श समितिले विधेयक परिपक्व भएपछि प्रक्रियामा लैजाने निर्णय गरेको थियो ।

नेपालमा कोरोनालाई जितेर घर फर्कनेको संख्या १ सय ८३ पुग्यो

नेपालमा कोरोनाभाइरस (कोभिड- १९) संक्रमण निको भएर घर फर्किनेको संख्या १ सय ८३ पुगेको छ ।

बुधवार थप २८ जना संक्रमणमुक्त भएर घर फर्किएको जानकारी स्वास्थ्य तथा जनसंख्या मन्त्रालयले बुधवार पत्रकार सम्मेलन गरी दिएको छ ।

नारायणी अस्पताल वीरगञ्जबाट २१ जना, कोशी अस्पताल विराटनगरबाट ४ जना, सुशील कोइराला प्रखर अस्पताल बाँकेबाट २ जना र बर्दियाबाट १ जना कोरोना निको भएर घर फर्किएको जानकारी स्वास्थ्य मन्त्रालयका प्रवक्ता डा. विकास देवकोटाले जानकारी दिए ।

नारायणी अस्पतालबाट डिस्चार्ज भएका २१ जना भर्ना भएको ११ देखि १४औं दिनमा घर फर्किएका हुन् ।

कोशी अस्पतालबाट घर फर्किनेहरू भने १७ देखि ३६औं दिनमा डिस्चार्ज भएका छन् ।