कोरोनाभाइरसका सम्बन्धमा तनावको स्थितिमा अमेरिकाले चीनलाई दण्ड दिने योजना बनाएको छ । 

अमेरिकाको प्रतिनिधिसभाले उइगुर मुसलमानहरूलाई उत्पीडन गर्ने चिनियाँ अधिकारीहरूमाथि प्रतिबन्ध लगाउने कानूनलाई भारी बहुमतका साथ बुधवार पारित गरेको छ । विधेयकलाई स्वीकृतिका लागि राष्ट्रपति डोनल्ड ट्रम्पसमक्ष पठाइएको छ । 

विधेयकको पक्षमा ४१३ र विपक्षमा एक मत परेको थियो । विधेयक पारित भएपछि यसमा ट्रम्पले चाँडै हस्ताक्षर गर्ने बताइएको छ । 

उइगुर विधेयकका कारण अमेरिका र चीनबीचको विवाद थप गहिरिन बताइएको छ । चीनले यसलाई सम्प्रभुताको उल्लंघन बताउने गरेको छ भने अमेरिकाले यसलाई मानअधिकारसम्बन्धी कदम भन्ने गरेको छ । 

उइगुर मध्य एसियामा बस्ने टर्किश समुदायका मानिस हुन् । उनीहरू पश्चिम चीनको तारिम, जंगार र तरपान क्षेत्रमा बस्ने गर्छन् । शिनजियाङ उइगुर स्वायत्त क्षेत्रका रूपमा चिनिन्छ र यो क्षेत्र चीनको कुल क्षेत्रफलको लगभग १७ प्रतिशत छ । 

सन् १९४९ भन्दा अघि शिनजियाङमा ९५ प्रतिशत उइगुर मुसलमान थिए भने अहिले जम्मा ४५ प्रतिशत छन् ।