गण्डकी प्रदेश सरकारको नीति तथा कार्यक्रम जेठ १८ मा

विजय उत्सव
विजय उत्सव

पत्रकार विजय उत्सव लोकान्तरका गण्डकी प्रदेश प्रतिनिधि हुन् ।

गण्डकी प्रदेश सरकारले आर्थिक वर्ष २०७७/७८ को नीति तथा कार्यक्रम जेठ १८ मा ल्याउने भएको छ । गण्डकी प्रदेशसभाको बजेट अधिवेशनअन्तर्गत प्रदेशका आर्थिक मामिला तथा योजना मन्त्री किरण गुरुङले जेठ १८ गते दिउँसो ३ बजे सरकारको नीति तथा कार्यक्रम प्रस्तुत गर्ने मन्त्रिपरिषद्ले निर्णय गरेको जानकारी सरकारका प्रवक्ता रामशरण बस्नेतले दिए ।

उनका अनुसार यस वर्षको नीति तथा कार्यक्रम विश्वव्यापी महामारीको रुपमा फैलिएको कोरोना भाइरस (कोभिड–१९) विरुद्ध केन्द्रित हुने गरी आउनेछ । जेठ १४ मा प्रदेश सभामा अर्थमन्त्री गुरुङले आगामी आर्थिक वर्षको विनियोजन विधेयकका सिद्धान्त र प्राथमिकता संसद्मा प्रस्तुत गरेका थिए ।


Advertisement

उनले सो प्रस्तुत गर्दै सरकारले हाल नयाँ योजनाभन्दा कोरोनाबाट बच्न, बचाउन र यसबाट सृजित समस्या समाधानतर्फ बजेट विनियोजन हुने बताएका थिए । जसमा चालू वर्षमा ३१ प्रतिशत हाराहारीमा खर्च गरेको सरकारले आगामी वर्षको बजेटमा अधिकांश प्राथमिकता दोहो¥याएको छ ।

सरकार गठन भएकै वर्षदेखिका कतिपय प्राथमिकता अझै पनि निरन्तर छन् । चालू वर्षमै सक्ने भनिएको आधारभूत खानेपानी र ‘एक घर, एक धारा’ अभियान आगामी वर्षको पनि प्रमुख प्राथमिकतामा छ । प्रदेशभित्र मुटु, मृगौला, क्यान्सर, मातृ तथा बालरोगसम्बन्धी विशिष्टीकृत अस्पताल निर्माण गर्ने कार्यक्रम सरकार गठन भएको दिन निर्णय गरिएको हो ।


Advertisement

सरकारले कोरोना भाइरसको रोकथाम, नियन्त्रण र उपचार प्रभावकारी बनाउन श्रोत र साधन सुनिश्चित गर्ने दाबी गरेको छ ।

‘क्वारेन्टाइनहरुको गुणस्तर र क्षमता बढाउने, उपचारको लागि विशेष अस्पताल स्थापना गर्ने, जिल्ला अस्पतालमा शैया थपेर सघन उपचार कक्ष स्थापना गर्न आवश्यक बजेट विनियोजन गरिनेछ,’ प्रस्तुत सिद्धान्त र प्राथमिकतामा भनिएको छ ।

कोरोना महामारी र लकडाउन कारण मुलुकमा उत्पन्न असामान्य अवस्था तथा राष्ट्रिय अर्थतन्त्रमा परेको प्रभाव आँकलन गरी बजेटका सिद्धान्त र प्राथमिकता तयार गरिएको अर्थमन्त्री किरण गुरुङले बताएका छन् ।

उनले प्रशासनिक र चालू खर्च घटाएर स्वीकृत दरबन्दीमा थप व्ययभार नहुने गरी प्रशासनिक संरचना तयार गर्ने, स्वदेशी कच्चा पदार्थमा आधारित आन्तरिक उत्पादन बढाउने, आयात प्रतिस्थापन गरेर निर्यात बढाउने, स्वरोजगार तथा रोजगारी सृजना गर्ने र गरीबी निवारणमा योगदान पुग्ने कार्यक्रमलाई आगामी वर्षको बजेटमा विशेष जोड दिइने गुरुङले बताए ।

विजय उत्सव
विजय उत्सव

लेखकबाट थप...

कमेन्ट गर्नुहोस्