अरब सागरमा उत्पन्न एक  शक्तिशाली  चक्रवातले  दक्षिण  एसियालाई  प्रभाव पार्ने र त्यसको असर नेपालमा पनि पर्ने भएको छ । 

चक्रवातको  असरले नेपालमा केही दिन भारी वर्षा गराउनेछ । चक्रवात  बुधवार  बिहानसम्म  शक्तिशाली  स्वरूप लिएर अगाडि बढ्ने मौसम पूर्वानुमान महाशाखाले जनाएको छ ।

'पूर्ण रूपमा चक्रवात नबन्दैको अवस्थामा पनि यति बेला भारतको गोवा क्षेत्रमा भारी वर्षा गराइरहेको छ । नेपालमा भने बुधबारदेखि बदली शुरू हुनेछ', मौसमविद् मञ्जु कँडेलले भनिन् । 

आउँदो  बिहीवार,  शुक्रवार  र  शनिवार  यसको  असर  नेपालमा  बढी  पर्ने  उनले  बताइन् । यसका कारण देशभर वर्षा हुने तथा पश्चिमका उच्च हिमाली क्षेत्रमा हिमपात हुने सम्भावना छ । गोरखापत्र दैनिकमा खबर छ ।