लद्दाख सीमाबाट चीन पछि हटेको भारतको दाबी

भारत र चीनबीच लद्दाख सीमामा भएको सैन्य गतिरोध अन्त्य भएर चीन पछि हटेको दाबी भारतीय सञ्चारमाध्यमले गरेका छन् । 

नवभारत टाइम्समा छापिएको खबरअनुसार, वास्तविक नियन्त्रण रेखाबाट चिनियाँ सैनिकहरू लगभग दुई किलोमिटर पर पुगेका छन् । अनि पहिले आक्रामक भएका चिनियाँ सेना विगत चार दिनदेखि शान्त छन् । 


Advertisement

अन्तर्राष्ट्रिय मामिलाविज्ञ कमर आगाले बताएअनुसार, भारतीय सीमाका सबै प्रमुख ठाउँमा चीनले एक एक इन्च गर्दै अघि बढ्ने रणनीति लिएको छ । सलामी रणनीति अन्तर्गत चीनको यो कदमले भारतीय क्षेत्र नियन्त्रणमा लिने देखिएको थियो तर चीन तत्काललाई पछि हटेको छ ।

चीन पछि हट्नुमा तीन कारण रहेको कमर आगा बताउँछन् । पहिलो, भारतीय सेनाले जवाफी कारवाहीका लागि गरेको तयारी । चीनले सीमाक्षेत्रमा सैन्य तैनाथी बढाएपछि भारतले पनि सैनिकको संख्या बढायो । चीनकै बराबरीमा हतियार, ट्यांक र युद्ध वाहनहरूलाई पनि उक्त क्षेत्रमा तैनाथ गरियो । 


Advertisement

सैन्य तयारीसँगै भारतले संयम देखाउँदै वार्ता पनि अघि बढाइरहेको छ । गतिरोध अन्त्यका लागि शनिवार दुई देशका लेफ्टिनेन्ट जनरल दर्जाका अधिकारीहरूबीच वार्ता हुँदैछ । विवाद शुरू भएदेखि १० चरणको वार्ता भइसकेको छ । 
कमर आगाका अनुसार, चीन पछि हट्नुको दोस्रो कारण उसको आन्तरिक संकट हो । कोरोनाभाइरस महाव्याधिका कारण चीनको अर्थतन्त्र संकटमा परेको छ । चिनियाँ निर्यात घटेको छ र नागिरकहरूमा बेरोजगारी र असन्तोष बढिरहेको छ । 

त्यसलाई सम्बोधन गर्न चिनियाँ कम्युनिस्ट पार्टीले राष्ट्रवादको कार्ड उपयोग गरिरहेको छ । ताइवान, हङकङ र दक्षिण चीन समुद्रका साथसाथै भारतसँगको सीमामा ऊ आक्रामक बन्नुमा यही राष्ट्रवादी पोस्चर जिम्मेवार छ । 

तेस्रो कारण चाहिँ संसारभरिबाट चीनमाथि परेको दबाब हो । अमेरिकासँग चीनले कोरोनाभाइरसका विषयमा विवाद र व्यापारयुद्ध गरिरहेको छ अनि जापान, भियतनामक, अस्ट्रेलिया लगायतका मुलुकले उसको आलोचना गरिरहेका छन् । यस्तोमा भारतलाई समेत चिढ्याएर उसले विशाल भारतीय बजारलाई गुमाउने जोखिम मोल्दैन । 

एजेन्सी
एजेन्सी

लेखकबाट थप...

कमेन्ट गर्नुहोस्