कर्णाली प्रदेशमा  एकैदिन १ सय १४ जनामा कोरोना भाइरस पोजेटिभ पुष्टि भएको छ।

कर्णाली स्वास्थ्य विज्ञान प्रतिष्ठान जुम्लाले गरेको आरटी पीसीआर परीक्षणबाट दैलेखका १ सय १३ र मुगुको १ जनामा कोरोना पोजेटिभ रिपोर्ट आएको कर्णाली प्रदेश सरकार सामाजिक विकास मन्त्रालय स्वास्थ्य सेवा महाशाखाका प्रमुख डा लक्ष्मीनारायण तिवारीले जानकारी दिए।

यसमा दैलेख नारायण नगरपालिकाका ६७ पुरुष र पाँच महिला गरी ७२ जना रहेका उनले बताए।

त्यस्तै, दैलेख देवलकाँडाका १२, सोतका ९, मानटाकुराका ७, नौमुलेका ५, भगनीका ५, साडुका २ र बाँसकोटका १ जना छन्। बिहीबार  सङ्क्रमितको यो सङ्ख्यासँगै कर्णालीका कोरोना सङ्क्रमित व्यक्तिको सङ्ख्या ३ सय ८९ पुगेको सामाजिक विकास मन्त्रालय स्वास्थ्य सेवा महाशाखाले जनाएको छ।