धनुषाको सबैलामा फरक फरक घटना भएका कारण तनाव उत्पन्न भएको छ ।

प्रहरी हिरासतमा रहेको एक जना शौचालयमा झुन्डिएको अवस्थामा फेला परे पछि तथा सबैलामा नै  एक जनाको गोली प्रहार बाट हत्या भए पछि स्थानीय बासीहरु आक्रोशित भएका छन् । 

जिल्ला प्रहरी कार्यालय धनुषाका प्रहरी नायब उपरीक्षक रामेश्वर कार्कीका अनुसार इलाका प्रहरी कार्यालय सबैलाको हिरासतमा रहेका सबैला नगरपालिका वडा नम्बर १२ बरकुर्बाका २३ बर्षीय शम्भु सदाको शब शौचलायमा झुन्डिएको  अबस्थामा फेला परेको छ ।  जेठ १२ गते ट्याक्टर दुर्घटनामा एक जनाको मृत्यु भए पछि उनलाई पक्राउ गरी कारबाही गरिएको थियो । 

उता  सबैला नगरपालिका वडा नम्बर ७ लबटोलीका २५ बर्षीय हारून मण्डलको हत्या गरिएको अबस्थामा शब बरामद भएको छ । घर नजिकै उनलाई छातीमा गोली प्रहार गरी हत्या गरिएको अबस्थामा शब बरामद भएको डीएसपी कार्कीले बताएका छन् । 

घटनाबाट आक्रोशित बनेका स्थानीयबासीहरुले प्रहरी चौकीमा ढूंगामुढा समेत गरेका छन । प्रहरी चौकीमा राखिएको प्रहरी भानको सिसा फुटेको डीएसपी कार्कीले बताए ।  

स्थितिलाई नियन्त्रणमा लिन प्रहरीले अश्रु ग्यास समेत प्रहार गरेको छ । घटनास्थलमा प्रहरी उपरीक्षक रमेश कुमार बस्नेत आफैं खटिएका छन् । दुबै घटनाको छानबिन अहिले जारी नै रहेको कारण थप कुराहरु अनुसन्धान बाट मात्रै खुल्ने उनले बताए ।