क्वारेन्टीनमा लामो समय  बसेर डिस्चार्ज गरेर घर पठाइएका ब्यक्तिहरूमा कोरोना पोजेटिभ पाइएको छ । धनुषाको बिदेहनगर नगरपालिकाको क्वारेन्टीनमा २६ दिन सम्म बसेका ब्यक्तिलाई घर पठाएको दुई दिन नबित्दै ७ जना ब्यक्तिहरूमा कोरोना पोजेटिभ पाइए पछि गाउँभरी त्रास फैलिएको छ । 

धनुषाको बिदेहनगरपालिकाको वडा नम्बर १ ठाढी गाउँका ४ जना पुरुषहरू, वडा नम्बर ५ एकराही गाउँका १ जना पुरुष, वडा नम्बर ६ गिद्धा गाउँका १ जना पुरुष र वडा नम्बर ७ लबटोलीका १ जनामा कोरोना संक्रमण पाइएको छ । उनीहरू उक्त नगरपालिकाको वडा नम्बर ६ को तिनकौरिया चौकमा एउटा माध्यमिक बिद्यालयमा संचालित क्वारेन्टीनमा २४ देखि २६ दिन सम्म बसेका थिए ।

 उक्त क्वारेन्टीनका संयोजक समेत रहेका स्वास्थ्यकर्मी राम सुन्दर साहका अनुसार संक्रमित ७ जना मध्ये ६ जना २६ दिन सम्म र १ जना २४ दिन सम्म क्वारेन्टीनमा बसेका थिए । भारतको दिल्ली, मुम्बई, अहमदाबाद सहित बिभिन्न शहरबाट आएकाहरू क्वारेन्टीनमा बसेका थिए । जेठ १९ गते उनीहरूको स्वाब संकलन गरेर परीक्षणका लागि काठमाडौं स्थित राष्ट्रिय जनस्वास्थ्य प्रयोगशाला टेकुमा पठाइएको थियो । 

‘कोरोना रोगको लक्षण नदेखिएका तथा १४ दिन भन्दा बढी समय क्वारेन्टीनमा बसेका मानिसहरूलाई डिस्चार्ज गरेर घर पठाउन संघीय सरकारको स्वास्थ्य मन्त्रालयले नै परिपत्र जारी गरेका कारण उनीहरूलाई हामीले जेठ २६ गते डिस्चार्ज गरेका थियौं,’ क्वारेन्टीन संयोजक साहले लोकान्तर सँग भने,‘तर, जेठ २८ गते उनीहरूको स्वाबको रिपोर्ट पोजेटिभ आयो । ’

उनीहरूको रिपोर्ट पोजेटिभ आए पछि जेठ २८ गते राती नै सातै जनालाई उनीहरूको घर बाट फिर्ता बोलाएर क्वारेन्टीनमा राखिएको छ । संक्रमित सातै जनालाई आइसोलेसनमा भर्ना गर्नका लागि सवारी साधन उपलब्ध नभएका कारण क्वारेन्टीनमा नै राख्नु परेको साहले बताए ।

‘हाम्रो नगरपालिकासँग एम्बुलेन्स छैन, बाहिरका कतिपय एम्बुलेन्स तथा निजी गाडीमा समेत आइसोलेसनमा पठाउनका लागि गाडी खोज्दा गाडी नै उपलब्ध हुन सकेको छैन,’ साहले भने,‘आज बिहीवार नभए नगरपालिकाको ट्याक्टरमा नै भए पनि धनुषाको सपही स्थित आइसोलेसनमा पठाउनेछौं । ’

संक्रमित भएका सातै जना डिस्चार्ज भएर गए पछि आफ्नो घर परिवारमा घुलमिल हुनुका साथै गाउँ भरी घुमफिर गर्दा धेरै मानिसहरूको सम्पर्कमा आएका कारण गाउँमा रहेका स्थानीयहरूमा त्रास बढेको छ ।