अमेरिकाबाट प्रकाशित हुने द न्युयोर्क टाइम्सको एक खबरअनुसार अफगानिस्तानमा अमेरिकी सैनिकहरूको हत्या गर्नका लागि रुसले तालिबानलाई पैसा दिएको छ । 

तर यस खबरलाई अमेरिकाको राष्ट्रिय जासूसी संस्थाका निर्देशकले पुष्टि गर्न मानेनन् र यस विषयमा ह्वाइट हाउसलाई खबरै नगरिएको बताए । 

न्युयोर्क टाइम्सको यो खबर नाम नखुलाइएका स्रोतको भनाइका आधारमा तयार पारिएको हो । यसमा अमेरिकी सैनिकहरूलाई अफगानिस्तानमा मार्नका लागि रुसले तालिबानसँग जोडिएका लडाकूलाई पैसा दिएको र ट्रम्पले

यसबारेमा थाहा पाएर पनि केही कदम नचालेको उल्लेख छ । 

अमेरिकी जासूसी निकायले ट्रम्प र उपराष्ट्रपति माइक पेन्सलाई यस विषयमा कहिले पनि जानकारी नदिएको ह्वाइट हाउसले जनायो ।
 

नेसनल इन्टेलिजेन्सका निर्देशक जोन र्‍याटक्लिफले यो समाचार र यससँग जोडिएका अन्य खबरहरू सही नभएको बताए ।

रुसले न्युयोर्क टाइम्सको खबर झूटो सूचना प्रवाह गर्ने भद्दा सामग्री भएको र यसले अमेरिकी जासूसी निकायका प्रचारकहरूको बौद्धिक क्षमतामा प्रश्न उठाएको बताएको छ ।