जनता समाजवादी पार्टी (जसपा)का नेता तथा पूर्व प्रधानमन्त्री डा. बाबुराम भट्टराईले प्रधानमन्त्री ओलीलाई हटाउने उचित बेला कहिले रहेछ भन्दै कटाक्ष गरेका छन् ।

प्रधानमन्त्री ओलीले आइतवार आफ्नो सरकारीनिवास बालुवाटारमा नेपालस्थित भारतीय दूतावासप्रति लक्षित गर्दै आफूलाई हटाउने चलखेल भइरहेको बताएका थिए । आफूले नेपालको अद्यावधिक नक्सा जारी गरेकाले आफूलाई हटाउन चलखेल भइरहेको ओलीको तर्क थियो ।

डा. भट्टराईले बहुमत प्राप्त प्रधानमन्त्री ओलीलाई आफ्नै पार्टीले बाहेक अरूले हटाउन सक्ने व्यवस्था नेपालको संविधानमा नभएको भन्दै सामाजिक सञ्जाल ट्वीटरमा लेखेका छन्, ‘तर अहिले हटाए नक्सा छापेको करणले हुने ! भोलि सलहले दुख दिएको बेला हुने ! पछि बाढीपैरो आएको बेला हुने ! अलिपछि दशैंतिहारको बेला हुने ! अनि जाडोको बेला हुने ! उचित बेला चैं कैले रच हँ ?’

प्रधानमन्त्रीले दिएको अभिव्यक्तिले कूटनीतिक सीमा नाघेको भन्दै आलोचना भइरहेको छ ।