नेपाल कम्युनिस्ट पार्टी संसदीय दल कर्णाली प्रदेशको बैठक विना एजेण्डा २ दिन बसेको छ ।

सरकारमा रहेका मन्त्रीहरुलाई फिर्ता बोलाउने, बजेट माथि सत्तारुढ सांसदको आक्रोश मत्थर पार्ने लगायतका एजेण्डामा छलफल हुने कुरा थियो ।

असार १३ गते विहान सात बजे सुरु भएको बैठकको शुरूमै सरकारका आर्थिक मामिला तथा योजना मन्त्री प्रकाश ज्वालाले आर्थिक वर्ष २०७७÷०७८ का लागि ल्याइएको बजेटमाथि एक घण्टा बोले ।

उनले बोलेलगत्तै अन्य कुनै पनि एजेण्डा तय नगरी सरकार विरुद्ध सत्तारुढ दलका सांसदहरुले बजेटमाथि, सरकारको कार्यशैलीमाथि लगातार आक्रोश पोखिरहे । सोही दिनको अन्तिम वक्ताका रुपमा रहेका सांसद धर्मराज रेग्मीले एजेण्डा विहीन बैठकको के अर्थ छ भनेर प्रश्न गरे ।

‘बैठकको एजेण्डा के हो ? किन बोलाइएको हो ? बजेटकै विषयमा हो की अरु केहि हो ?’ उनले भनेका थिए, ‘विना एजेण्डा २ दिनसम्म बैठक बस्नुको कारण के रहेछ ?’

सत्तारुढ दलका ३१ जना सांसदहरुको सहभागिता रहेको उक्त बैठक असार १४ गते विहान ८ बजेदेखि साँझ ८ बजेसम्म बस्यो । बैठकमा चन्द्रबहादुर शाही, करवीर शाही, देवी वली, सीता नेपाली, गुलावजँग शाही, यामलाल कंडेल लगायतले आफ्ना धारणा राखे । तर ती सबैको धारणा बजेट संशोधन गर्ने, सरकारका काम कारवाही चुस्त र दुरुस्त बनाउनु पर्ने भनाई राखे ।

‘हामीले त सरकारलाई निरन्तर खबरदारी गरिरहेका छौं । सरकार तीव्र गतिका साथमा हिड्नुपर्छ । कहाँ समस्या छन्, ती समस्या समाधान गर्न हामी तयार नै छौं,’ एक सांसदले लोकान्तरसँग भने, ‘तरपनि सरकार टसको मस हुँदैन । कर्मचारीकै आधारमा बजेट बनाउने, उनीहरुको हालीमुहाली हुने र जिल्लामा डल्लो बजेट पठाई कार्यान्वयनमा कर्मचारीकै हात माथि पर्ने काम गलत हो । कम्तीमा सरकारले डल्लो बजेट फुटाउनै पर्छ । यो वर्ष घाटा बजेट पनि छैन । धेरै बजेट कम भएको पनि छैन । सरकारले बजेट सुधार नगरेसम्म हामी ताली बजाएर पास गर्ने पक्षमा हामी छैनौं ।’

दलका प्रमुख सचेतक गुलावजंग शाहले बैठकमा समसामयिक एजेण्डा भएको बताए । ‘सरकारलाई माननीयले डल्लो बजेट फुटाउन, सरकारलाई परेका समस्या समाधान गर्न आवश्यक सुझाव दिनु भएको हो,’ उनले भने, ‘माननीय ज्यूहरुको बजेट प्रति र सरकारको काम कारवाही प्रति चर्को असन्तुष्टि बैठकमा देखियो । दलको बैठकको अन्य एजेण्डा भन्दा पनि बजेटकै पेरीफेरी थियो । सरकारका मन्त्रीहरु फेर्ने भन्ने कुरा एजेण्डा नै थिएन ।’