भारतको केन्द्र सरकारका मन्त्री तथा पूर्व सेनाप्रमुख भीके सिंहले लद्दाखमा गाडिएका चिनियाँ टेन्टमा रहस्यमय आगो लागेपछि दुई देशका सैनिकबीच झडप भएको बताएका छन् । 

चिनियाँ सैनिकको टेन्टमा के राखिएको थियो, त्यो बताउन मुश्किल भएको उनको भनाइ छ । 
 

भीके सिंहको यो दाबी अहिलेसम्म आइरहेका कुराभन्दा फरक छ । अहिलेसम्म त चिनियाँ सैनिकहरू पछि हट्न नमानेकाले भारतीय सैनिकहरूले टेन्ट उखेलेर फालेको कुरा आइरहेको थियो । 
 

भीके सिंहका अनुसार, जुन १५ को राति कमान्डिङ अफिसर सन्तोष बाबु पट्रोल पोइन्ट १४ पुग्दा चीनले टेन्ट नहटाएको देखे । भारतीय सैनिकहरू पछि हटे कि हटेनन् भनी जाँच्नका लागि उक्त टेन्ट चिनियाँहरूले लगाएका थिए । 

त्यसपछि चिनियाँ र भारतीय सैनिकहरूबीच कुराकानी हुँदा सन्तोष बाबुले चिनियाँ सैनिकलाई पछि हट्न भने । 

चिनियाँ जनमुक्ति सेनाका जवानले टेन्ट हटाउन थाल्दा अचानक आगो लाग्यो । चिनियाँले टेन्टमा के राखेका थिए भन्ने कुरा अहिलेसम्म खुलेको छैन । 

सिंहका अनुसार, त्यही रहस्यमयी आगोका कारण दुई पक्षका सैनिकबीच चर्काचर्की पर्‍यो अनि हिंसक झडप भयो ।