लद्दाखको गलवान उपत्यकामा वास्तविक नियन्त्रण रेखामा भारत र चीनबीच तनाव जारी रहँदा चिनियाँ ह्याकरहरूको आक्रमण बढिरहेको देखिएको छ । 
 

सिंगापुरस्थित साइबर रिसर्च फर्म साइफिरमाका अनुसार, हिंस्रक भिडन्तपछि चिनियाँ ह्याकरहरूको आक्रमणमा ३०० प्रतिशत वृद्धि भएको देखिएको छ । 
 

साइफिरमाका अध्यक्ष कुमार रितेशका अनुसार, गलवान भिडन्तपछि साइबर आक्रमण बढेको हो । 
 

साइफिरमाले भारतको नोडल एजेन्सी कम्प्युटर इमर्जेन्सी रेस्पोन्स टीमलाई आफ्नो निष्कर्ष दिएको हो । सीमाविवाद चर्किएपछि भारतविरुद्ध चिनियाँ डार्क वेब गतिविधि बढेको बताइएको छ । 
 

रितेशले भने, ‘चिनियाँ ह्याकरहरूले भारतका संवेदनशील क्षेत्रको जानकारी एकत्रित गरिरहेका छन् र प्रोफाइलिङ बढाएका छन् । अब ती प्रोफाइलमा एक एक गरी साइबर आक्रमण गरिन सक्छन् ।’

उनका अनुसार, भारतको मोबाइल सर्भिस, मिडिया कम्पनी र सरकारी निकायहरूलाई तारो बनाएको देखिन्छ ।

संवेदनशील जानकारी, आँकडा, ग्राहक जानकारी तथा बौद्धिक सम्पत्तिको चोरीका लागि वेबसाइट र कम्प्युटरलाई हानि गर्नका लागि आक्रमण गरिएको हो । 

पहिलेपहिले चिनियाँ ह्याकरहरू पाकिस्तान र उत्तर कोरियास्थित ह्याकरको सहायता लिएर भारतमाथि आक्रमण गर्ने गर्थे । तर अहिले चिनियाँ आफैंले आक्रमण गर्न थालेका हुन् । उनीहरूको लक्ष्य भारतीय संस्थाहरूबाट संवेदनशील डेटा जम्मा पार्नु हो ।