अमेरिकामा कोरोनाभाइरस संक्रमण लगातार बढिरहँदा राष्ट्रपति डोनल्ड ट्रम्प चीनप्रति आक्रोशित छन् । 

स्वास्थ्य अधिकारीहरूले महामारीमाथि पूर्ण नियन्त्रण गर्न आफूहरू असमर्थ रहेको भनी चेतावनी दिएका छन् । 

ट्रम्पले एक ट्वीट गर्दै लेखे, ‘सारा संसारमा महामारीको भद्दा रूपमा फैलिरहँदा अमेरिकालाई पनि ठूलो क्षति पुगिरहेको अवस्थामा चीनप्रति मेरो आक्रोश झनझनै बढिरहेको छ । मानिसले यो देख्न सक्छन् अनि म पनि यसको अनुभव गर्दैछु ।’

कोरोनाभाइरस महाव्याधिका लागि ट्रम्प बेइजिङलाई दोषी ठहर्‍याइरहेका छन् । दुई देशबीच व्यापारयुद्ध चलिरहँदा कोरोनाभाइरसले झनै तनाव बढाएको छ । 

अमेरिकामा संक्रमण घट्ने कुनै संकेत देखिएको छैन । सरुवा रोग विशेषज्ञ डा एन्थोनी फाउचीले मंगलवार संसद्समक्ष बोल्दै कामकुरो गलत दिशातिर अघि बढिरहेको र यसमा नियन्त्रण कायम गर्न आफूहरू विफल रहेको बताए । 

अमेरिकी सरकार र जनताले महामारी रोकथामका लागि आवश्यक कदम नउठाएमा अमेरिकामा प्रत्येक दिन एक लाख केस देखापर्ने चेतावनी फाउचीले दिए । 

चीनले चाहिँ ट्रम्प प्रशासनमाथि महामारीको राजनीतीकरण गरेको आरोप लगाएको छ । अमेरिकाले आफ्नो देशमा फैलिएको महामारीलाई सम्हाल्न नसकेकाले ध्यान भड्काउनका लागि यस्तो आरोप लगाएको चीनको भनाइ छ । अमेरिकी अधिकारीहरूले चीनसँग पारदर्शिता अपनाउन माग गरिरहेका छन् ।