लकडाउनले आर्थिक चपेटामा सैलुन व्यवसायी

प्रतिकात्मक तस्वीर

बन्दाबन्दी खुकुलो हुँदै गए पनि सरकारले अझै केही समय सैलुन (नाइ) व्यवसाय सञ्चालनमा रोक लगाएपछि व्यवसायी मर्कामा परेका छन् ।

कोरोना भाइरस संक्रमण फैलिन सक्ने भन्दै सरकारले होटल, रेस्टुरेन्ट, सैलुन, ब्युटीपार्लर लगायतका केही व्यवसाय सञ्चालनमा रोक लगाएको छ ।


Advertisement

यसले गर्दा तराई मधेशबाट यहाँ आएर भाडामा बस्दै आएका सैलुन व्यवसायी ठूलो आर्थिक चपेटामा परेका छन् ।
 
दाह्री, कपाल काटेर गुजारा चलाउँदै आएका व्यवसायीले ४ महिनादेखि व्यवसाय ठप्प हुँदा आफूहरू मर्कामा परेको बताएका छन् । अन्य व्यवसायजस्तै सुरक्षाका विधिहरू अपनाएर सैलुन व्यवसाय सञ्चालन गर्न पाउनुपर्ने उनीहरूको माग छ । नेपाल नाई संघले आफ्नो व्यवसाय क्षेत्रको समस्याबारे शुक्रवार प्रमुख जिल्ला अधिकारी हीरालाल रेग्मीलाई ज्ञापनपत्र बुझाइसकेको छ ।

प्रशासनले व्यवसाय सञ्चालनमा सहजीकरण गरिदिनुपर्ने नाई संघको माग छ ।
 
नाई व्यवसायी विनोद ठाकुरले लामो लकडाउनले बिहान–बेलुकाको छाक टार्न समस्या भएको गुनासो गरे । ‘हाम्रो व्यवसाय ४ महिनादेखि पूर्णरूपले बन्द छ, पसलको भाडा, घरभाडा तिर्न र बिहान–बेलुका के खाने भन्ने समस्या भइसक्यो,’ उनले भने, ‘सबै व्यवसायी परिवारसहित तराई–मधेसबाट आएर यहाँ घर भाडा लिएरै बसेका छौं, लकडाउनमा अन्य व्यवसाय खुले पनि सैलुन व्यवसाय सरकारले बन्द गर्दा हामी ठूलो मर्कामा पर्‍यौं ।’ 


Advertisement

अर्का व्यवसायी सुवीर अन्सारीले आफूहरूको एक मात्र पेशा बन्द हुँदा जीविकोपार्जनमा कठिनाइ भएको बताए । ‘पसल र घरको भाडा तिर्नै समस्या भइसक्यो, घरबेटीले बारम्बार भाडा माग्न थाले, अब सापटी माग्न ठाउँ समेत रहेन,’ अन्सारीले भने । नेपाल नाई संघ सुर्खेतका अनुसार सुर्खेत उपत्यकामा झण्डै ५० सैलुनहरूका २०० युवाको रोजगारी गुमेको छ । 

कमेन्ट गर्नुहोस्