पार्टी भित्रको बिवाद उत्कर्षमा पुगेको समयमा सहमतिको प्रयास स्वरुप नेकपा अध्यक्ष एवं प्रधानमन्त्री केपी शर्मा ओलीसँग छलफल गर्न नेकपा अध्यक्ष पुष्पकमल दाहाल प्रचण्ड आइतवार दिउँसो १२ :  १५ मा बालुवाटार पुगेका छन् । 

बालुवाटार जानुअघि प्रचण्ड सहित वरिष्ठ नेताद्वय झलनाथ खनाल र माधवकुमार नेपालले संयुक्त रूपमा राष्ट्रपति विद्यादेवी भण्डारीसँग भेटघाट गरेका थिए ।

भेटमा पार्टीभित्रको आन्तरिक विवादका बारे छलफल भएको थियो  ।

जारी स्थायी कमिटी बैठक केही दिनका लागि स्थगित गरेर सहमति खोज्न भन्दै शुक्रवार पनि ओली र प्रचण्डबीच छलफल भएको थियो । शनिवार थप छलफल गर्ने भन्दै शुक्रवार बैठकबाट उठेका दुई नेताबीच शनिवार कुनै सहमति जुट्न सकेन । 

शनिवार प्रचण्डले माधव नेपाललगायत सचिवालयका सदस्यहरुसँग छलफल गरेका थिए भने ओलीले सरकारमा सहभागि मन्त्री र राज्यमन्त्रीहरूसँग छलफल गरेका थिए । 

शनिवार राति बालुवाटारमा भएको छलफलमा प्रधानमन्त्री ओलीले राष्ट्रपति र आफुविरुद्ध षडयन्त्र भएकोले आफू जस्तो सुकै कदम चाल्न बाध्य हुने बताएका थिए । 

मन्त्रीहरुसँग प्रधानमन्त्रीको ब्रिफिङ पछि नेकपा भित्रको विबाद झनै पेचिलो बन्दै गएको विश्लेषण गरिएको छ । नेकपाकै केही नेताहरू पार्टीभित्र उत्पन्न बिवाद समाधानका लागि अहिले पनि पहल गरिरहेका छन् । 

ओली र प्रचण्डबीच सहमति खोज्न भन्दै शनिवारका लागि बोलाइएको स्थायी कमिटी बैठक भोलि सोमबारसम्मको लागि स्थगित भएको छ ।

असार १० गते शुरू भएको स्थायी कमिटी बैठकमा गत मंगलवार प्रचण्डलगायत शीर्ष नेताहरूले ओलीको राजीनामा माग गरेपछि नेकपा बिवाद नयाँ चरणमा प्रवेश गरेको हो । 

शुक्रवारको बैठकमा प्रचण्डले आलोपालो सरकारको नेतृत्व गर्ने गरी २०७५ जेठ २ गते भएको सहमतिमा फर्किन प्रस्ताव गरेका थिए भने ओलीले प्रचण्डलाई कार्यकारी अध्यक्ष बनाउने २०७६ मंसिरको प्रस्तावलाई थप व्याख्या गरेर जान प्रस्ताव गरेका थिए ।