सार्वजनिक सवारी साधन तत्काल सञ्चालन हुँदैनन्

सरकारले व्यवसायी र मजदुरहरूको माग सम्बोधन गरे तत्कालै आफूहरूले सार्वजनिक यातायात सञचालन गर्ने नेपाल यातायात व्यवसायी राष्ट्रिय महासङ्घका अध्यक्ष योगेन्द्रनाथ कर्माचार्यले बताएका छन् ।
यो अवस्थामा यातायात सञ्चालन गर्नसक्ने अवस्था नरहेका कारण यातायात व्यवसायीहरूले यथास्थितिमा सार्वजनिक यातायातका साधन चलाउन नसक्ने कर्माचार्यले  बताए ।

सरकारसँग वैशाखदेखि नै आफूहरूकै बैङ्कको किस्ता र मजदुरहरूलाई बाँच्नसक्ने अवस्था सिर्जना गराउन माग गरिरहे पनि सरकारी संयन्त्रबाट आफूहरूलाई जवाफ नै नआएको कर्माचार्यले दाबी गरे।
‘व्यवसायीले अहिलेको अवस्थामा चालकलाई पिपिइ, यात्रुहरूलाई मास्क, सवारी साधनहरूको डिस्इन्फेक्सन गर्न सक्दैनौँ, त्यसको व्यवस्थापन सरकारले गर्नुपर्छ’ अध्यक्ष कर्माचार्यले भने।


Advertisement

सरकारले मासिक किस्ता तिर्न सक्ने अवस्था, मजदुरलाई पाल्नसक्ने अवस्था र दैनिक खर्चको व्यवस्थापनको ग्यारेन्टी सरकारले गरे मात्रै तत्कालै सार्वजनिक यातायात सञ्चालन गर्न सकिने उनले स्पष्ट पारे।
बसपार्कमा सवारी साधनहरूको दैनिक रुपमा निर्मलीकरण गर्नको लागि व्यवस्था, राजधानी भित्रने चार नाकामा समेत सुरक्षाको उपाय अपनाउन सक्ने व्यवस्था गरे मात्रै सार्वजनिक यातायात सञ्चालन हुन सक्ने भएकाले सरकारको जवाफ व्यवसायीहरूले कुरेर बसेको अध्यक्ष कर्माचार्यले भने।
लामो, मध्यम तथा छोटा दूरीका सवारी साधन चलाउँदा अपनाउनुपर्ने सावधानीको मापदण्ड बनाएर अघि बढ्न तयार रहेको बताउँदै अध्यक्ष कर्माचार्यले व्यवसायी यस्तो समयमा भाडा बढाउने पक्षमा नरहेको स्पष्ट पारे।

‘सरकारले साहुको चिन्ता लिनु परेन, तर मजदुर दैनिक खर्चको व्यवस्थापन गर्न पहल गरिदिनु पर्याे भनेका हौँ ’ अध्यक्ष कर्माचार्यले भने। सरकारले हाम्रो पक्षमा केही सहयोग गरिदिनुपर्यो भनेर अनुरोध गरेका छौँ ।
‘यो अवस्थामा गाडी सञ्चालन हुनु र रोकिनुमा केही फरक नपर्ने भएकाले यही अवस्थामा गाडी गुड्न सक्दैन भनेर सरकारलाई आफ्नो कुरा राखेका छौँ’ अध्यक्ष कर्माचार्यले भने,‘ सरकारले केही गर्ला भन्ने आशा छ ।’


Advertisement

यातायात व्यवस्था विभागका महानिर्देशक गोगनबहादुर हमाल यो विषम परिस्थितिमा सरकारको क्याबिनेटले निर्णय गरेपछि मात्रै यातायात सञ्चालन हुन सक्ने बताउँछन् । कोभिड–१९ को महामारीमा कोरोना नियन्त्रण उच्चस्तरिय समिति र क्याबिनेटले निर्णय गरेपछि मात्रै यातायात सञ्चालन हुन सक्ने र त्यो निर्णय भएपछि मात्रै आफूहरूले कसरी सार्वजनिक यातायात सञ्चालन गर्ने भनेर भन्न सक्ने बताए । सरकारले यातायात सञ्चालन गर्न सकिन्छ भनेर निर्देशन दिएमा आफूहरूले समेत कसरी चलाउन सकिन्छ भनेर तयारी थाल्ने उनले स्पष्ट पारे।

स्वास्थ्य मन्त्रालयले अब सार्वजनिक यातायात चलाउँदा हुन्छ भनेर भनेपछि मात्रै सार्वजनिक यातायात सञ्चालन गर्न सकिने र त्यसको बारेमा तयारी गरिने हमालले बताए । तर आफूहरूले त्यसको तयारी थाले पनि सरकारको निर्णय तथा स्वास्थ्य मन्त्रालयले दिने जोखिमको मूल्याङ्कनको आधारमा सार्वजनिक यातायातका साधन कसरी चलाउने भन्ने थाहा पाउने बताए । सरकारले निर्णय गरेपछि सुरक्षा, भाडा दरका विषयमा छलफल गरिने उनले बताए। केशवराज पौडेलले गोरखापत्र दैनिकमा खबर लेखेका छन् । 

छापाबाट
छापाबाट

लेखकबाट थप...

कमेन्ट गर्नुहोस्