भारत र चीनबीच लद्दाखमा तनाव चलिरहँदा तिब्बतबाट निर्वासित भएर भारतमा बसिरहेका नेताहरूले तिब्बतको विषय उठाउन भारतलाई सुझाव दिएका छन् । 

निर्वासित सरकारका प्रमुख लोबसाङ सांगेले भारतलाई चीनसमक्ष तिब्बतको मुद्दा उठाउन सुझाव दिएका हुन् । 

भारतले लद्दाखमा जाडो महिनासम्मका लागि तयारी गरिरहेको बताइएको छ । अर्थात् सीमा तनाव लामो समयसम्म जानसक्ने आकलन उसले गरेको छ ।

अहिलेको तनावमा तिब्बतलाई पनि एउटा विषय बनाउनुपर्ने सुझाव सांगेले दिएका छन् । भारतको सीमा चीनसँग नभई तिब्बतसँग रहेको उनको भनाइ छ । 
 

सांगेले भने, ‘तिब्बतको रणनीतिक महत्त्वलाई विचार गरेर भारतले यसलाई प्राथमिकताका साथ उठाउनुपर्छ । चीनले तिब्बत लिएबाटै संसारले पाठ पढ्नुपर्थ्यो । चीनले यस्ता किसिमका सैन्य साहस पछिसम्म पनि गरिरहनेछ ।’

भारतमाथि दबाब दिन र हिमालय क्षेत्रको भूराजनीतिमा परिवर्तन ल्याउन चीनले आक्रामकता बढाइरहेको उनको भनाइ छ ।