चीनका कोस्ट गार्ड जहाजहरूले विगत चार दिनमा जापानको नियन्त्रणमा रहेको जलक्षेत्र दुईपटक प्रवेश गरेको अनि जापानी जहाजहरूले तिनलाई एकपटक रोकेको टोक्योका अधिकारीहरूले बताएका छन् । 

चिनियाँ जहाजहरू जापानको नियन्त्रणमा रहेका सेन्काकु टापुसमूहको चार किलोमिटर क्षेत्रमा आएको र त्यो अन्तर्राष्ट्रिय सीमाको उल्लंघन भएको जापानी कोस्ट गार्डले जनाएको छ । सेन्काकुलाई चिनियाँहरू दिआयु भन्छन् । 
टोक्योले चिनियाँ जहाजका सम्बन्धमा बेइजिङ समक्ष कूटनीतिक विरोधहरू पेश गरिरहेको जापानको मन्त्रिपरिषद्का सचिव योशिहिदे सुगाले बताए । 

टोक्यो र बेइजिङ दुवैले ती टापुसमूहमा दाबी गरेका छन् तर जापानले सन् १९७२ देखि तिनमा दाबी गरिरहेको छ । 
 

टोक्योबाट १९ सय किलोमिटर टाढा रहेको टापुसमूहमा वर्षौंदेखि तनावको स्थिति छ । दुवैले त्यसलाई आफ्नो जन्मसिद्ध अधिकार मान्ने गरेका छन् । 

जापानको ओकिनावा नगर परिषद्ले टापुसमूहको प्रशासनिक हैसियत परिवर्तन गर्ने एक विधेयक पारित गरेपछि दुई देशबीचको तनाव चर्केको हो । उक्त टापुसमूह जापानी भूभागको एक अंग हो भनी उक्त विधेयकले दाबी गरेकाले बेइजिङले कडा विरोध जनाएको छ । 

सोमवार चीनको परराष्ट्र मन्त्रालयका प्रवक्ता झाओ लिजियानले उक्त टापुसमूहको जलक्षेत्रको गश्ती गर्ने अन्तर्निहित अधिकार चीनसँग भएको बताउँदै जापानलाई चीनको सार्वभौमसत्तामा दखल नदिन आग्रह गरेको छ । 

चीन सरकारका जहाजहरू उक्त टापुसमूहको जलक्षेत्रमा ८४ दिनदेखि घुमिरहेको जापानको कोस्ट गार्डले सोमवार जनायो । तर जापानको जलक्षेत्रमा चिनियाँ जहाज प्रवेश गर्दा विवाद चर्किएको हो । 
 

सीएनएनबाट