अकूत भ्रष्टाचार गरेर हाईफाई गर्ने इन्जिनीयरविरुद्ध विशेष अदालतमा आरोपपत्र दायर

खानेपानी तथा ढल व्यवस्थापन विभाग अन्तर्गत क्षेत्रीय आयोजना व्यवस्थापन कार्यालय नेपालगञ्जमा कार्यरत सिनियर डिभिजन इन्जिनियर पूर्णप्रसाद उपाध्यायविरुद्ध अख्तियार दुरुपयोग अनुसन्धान आयोगले आरोपपत्र दायर गरेको छ ।

आरोपपत्रमा भ्रष्टाचार गरी कमाएको अकूत सम्पत्ति ३ करोड १० लाख २७ हजार १५३ रुपैयाँ बिगो कायम गरिएको छ ।


Advertisement

अख्तियारका प्रवक्ता प्रदीपकुमार कोइरालाले प्रेस विज्ञप्ति जारी गर्दै आयोजना व्यवस्थापन कार्यालय नेपालगञ्जमा कार्यरत सिनियर डिभिजन इन्जिनीयर उपाध्यायले गैरकानूनी सम्पत्ति आर्जन गरी हैसियतभन्दा बढी अस्वाभाविक उच्च जीवनयापन गरिरहेको उजुरी आयोगमा दर्ता भएको जनाएका छन् ।

‘अनुसन्धानमा लिइएको जाँचअवधि सार्वजनिक सेवामा प्रवेश मिति २०६३/०९/०५ देखि २०७७ जेठ मसान्तसम्मको अवधिमा निज पूर्णप्रसाद उपाध्यायले सार्वजनिक सेवामा रही आर्जित भत्तालगायत पारिश्रमिक आय, श्रीमती दुर्गा खनाल रिमालको पारिश्रमिक आय, जग्गा भाडा, कर्मचारी सञ्चयकोष कर्जा, व्यक्तिगत सापटी, शेयर नगद लाभांश, पैतृक जग्गा बिक्रीबाट प्राप्त आय र निजको आयले खामेका बैंक मुद्दती खातामा रहेको निक्षेप परिपक्व पश्चात फिर्ता प्राप्त रकमसमेत गरी अनुसन्धानमा लिएको जाँच अवधिमा निज पूर्णप्रसाद उपाध्यायले जम्मा रु. १,९१,१६,२९८/– आयआर्जन गरेको देखिन्छ,’ विज्ञप्तिमा उल्लेख छ ।


Advertisement

‘निज पूर्णप्रसाद उपाध्यायले भ्रष्टाचार निवारण ऐन २०५९ को दफा २० को उपदफा (१) बमोजिमको कसुर गरेको पुष्टि हुन आएकोले निज पूर्णप्रसाद उपाध्यायलाई बिगो रु. ३,१०,२७,१५३/– (तीन करोड दश लाख सत्ताइस हजार एक सय त्रिपन्न रुपैयाँ) कायम गरी भ्रष्टाचार निवारण ऐन २०५९ को दफा २० को उपदफा (२) बमोजिम सजाय माग गरी निज र गैरकानूनी रुपमा आर्जन गरेको स्रोत नखुलेको सम्पत्तिहरुसमेत भ्रष्टाचार निवारण ऐन २०५९ को दफा २० को उपदफा (२), दफा ४७ तथा अख्तियार दुरुपयोग अनुसन्धान आयोग ऐन २०४८ को दफा २९ख. बमोजिम जफत गर्ने प्रयोजनार्थ निजको श्रीमती दुर्गा खनाल रिमाल उपाध्यायलाई समेत प्रतिवादी कायम गरी आज विशेष अदालत काठमाडौंमा आरोपपत्र दायर गरिएको छ ।’

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्