न्यायका लागि धाउन थाले पत्नीपीडित पति

दाङको तुलसीपुर उपमहानगरपालिकाको न्यायिक समितिले आजदेखि हटलाइन सेवा सञ्चालन गरेको छ ।  यहाँ आज आयोजित पत्रकार सम्मेलनमा न्यायिक समितिका संयोजक माया आचार्यले बन्दाबन्दीका समयमा हुने घरेलु, लैंगिकलगायत सम्पूर्ण हिंसा न्यूनीकरणका लागि हटलाइन सेवा सञ्चालनमा ल्याइएको जानकारी दिइन् ।

‘बन्दाबन्दीका समयमा धेरै हिंसा हुन सक्छन् र यस्ता हिंसा बढिरहेका छन्’,  नगर उपप्रमुख आचार्यले भनिन्, “ त्यसैले यसलाई न्यूनीकरण गर्न हामीले हटलाइनमार्फत सेवा दिन थालेका हौंँ ।”  


Advertisement

उनका अनुसार १६६०८२१८००१ मा आएका उजुरी सङ्कलन गरी न्याय दिइने छ ।  आवश्यकतानुसार बन्दाबन्दीका समयमा हिंसापीडितलाई मनोसामाजिक परामर्श सेवा प्रदान गराइएको, वडाका महिला सदस्यबाट वडाभित्रका घरझगडा, गालीबेइज्जती, कुटपिटलगायत विवाद मिलाइएको र  सामाजिक सञ्जालबाट पनि सूचना प्रवाह गरिएको उनले जानकारी दिइन् ।

श्रीमान् पनि पीडित ! 


Advertisement

न्यायिक समिति, अदालत तथा अन्य न्यायिक निकायमा धेरैजसो महिला हिंसाका उजुरी पर्ने गर्छन् । पछिल्लो समय स्थानीय तहका न्यायिक समितिमा श्रीमतीबाट श्रीमान् पीडित बनेका उजुरी पर्न थालेका छन् । 

चालु आर्थिक वर्षमा दुई पुरुष पीडित भएका उजुरी दर्ता भएको न्यायिक समिति संयोजक आचार्यले बताइन् ।

‘धेरै महिला हिंसाका उजुरीहरू पर्ने गरेका छन्’, उनले भनिन्, ‘पुरुष पनि हिंसामा परेको उजुरीहरू पर्ने गरेका छन् ।’

उनका अनुसार पुरुषलाई खानलाउन नदिएको, घरबाट निकाला गरेको र रकम हिनामिना गरेको भनी दुई उजुरी परेका छन् । ती उजुरीमा मिलापत्र गर्ने कार्य भइरहेको  उनको भनाइ छ ।  यसले श्रीमतीबाट श्रीमानहरूसमेत पीडित भएको देखाउने संयोजक आचार्यले बताइन् ।

उपमहानगरपालिकाको न्यायिक समितिले चालु आव  २०७६/०७७ मा ३२ उजुरी मिलापत्र गरेको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्