कर्णालीमा सकियो ६५ प्रतिशत रोपाइँ

शेरबहादुर थापा
शेरबहादुर थापा

लोकान्तर संवाददाता थापा कर्णाली प्रदेशबाट रिपोर्टिङ गर्छन् ।

कर्णाली प्रदेशमा ६५ प्रतिशत रोपाइँ सम्पन्न भएको प्रदेश कृषि विकास निर्देशनालयले जनाएको छ ।

विगतका वर्षमा वर्षा नहुँदा रोपाइँ ढिलो हुने भए पनि यसपालि पर्याप्त वर्षा भएका कारण रोपाइँ छिट्टै भएको छ ।


Advertisement

कर्णालीमा ४९ हजार ४२५ हेक्टरमा धान रोपाइँ गरिन्छ । गत आइतवारसम्म ३१ हजार ९११ हेक्टरमा रोपाइँ सम्पन्न भएको कृषि निर्देशनालयका सूचना अधिकारी यामबहादुर रानाले बताए । उनका अनुसार अघिल्लो हप्तामा कर्णालीमा जम्मा ३९ प्रतिशत रोपाइँ भएकोमा यस हप्ता ६५ प्रतिशत पुगेको हो ।

कर्णालीका जुम्ला, हुम्ला र डोल्पामा शतप्रतिशत रोपाइँ सम्पन्न भइसकेको छ । सुर्खेतमा गत आइतवारसम्म ४५ प्रतिशत रोपाइँ सम्पन्न भएको उनले बताए । ‘सुर्खेतमा १३ हजार ५०२ हेक्टरमा धान रोप्ने गरिएको छ । जसमा ६ हजार ७६ हेक्टरमा रोपाइँ सम्पन्न भइसकेको छ । यो जम्मा ४५ प्रतिशत हो । कालिकोटमा १ हजार ६७५ हेक्टर अर्थात् ६५ प्रतिशत रोपाइँ सम्पन्न भएको छ,’ उनले भने, ‘मुगुमा ७० प्रतिशत, सल्यानमा ८५ प्रतिशत, दैलेखमा ५५ प्रतितशत, जाजरकोटमा ९० प्रतिशत र रुकुम पश्चिममा ६० प्रतिशत रोपाइँ सम्पन्न भइसकेको छ ।’


Advertisement

कार्यालय प्रमुख चित्रबहादुर रोकायाका अनुसार हिमाली जिल्लामा चैतमै धानको बिउ राख्ने र वैशाखमै रोपाइँ शुरू हुने गरेका कारण शतप्रतिशत रोपाइँ सम्पन्न भएको छ । ‘विगतका वर्ष जस्तो यो वर्ष खडेरी परेन । पानी आइरह्यो,’ उनले भने, ‘त्यसैले पनि कृषकलाई ठूलो राहत दियो ।’

कर्णालीका पहाडी जिल्लामा आकाशे पानीकै भरमा अधिकांश खेत रोपिने गरेका छन् । ‘यो वर्ष शतप्रतिशत जग्गामा रोपाइँ हुने सम्भावना देखिएको छ,’ उनले भने ।

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्