कोरोना भाइरसबाट प्रभावित भएको पढाइलाई निरन्तरता दिन बाजुराको बूढीनन्दा नगरपालिकामा टोलमा गएर पढाउन शुरू गरिएको छ ।

नगरपालिका–२ को कोल्टीमा रहेको बूढीनन्दा आधारभूत विद्यालयले टोलमै शिक्षक पठाएर पढाइ शुरू गरेको विद्यालयका प्रधानाध्यापक विर्जनबहादुर शाहीले बताए ।

लामो समयको लकडाउनले विद्यालय सञ्चालनमा आउन नसकेका कारण विद्यार्थीको सिकाइमा निरन्तरता दिनका लागि टोल–टोलमा गएर पढाइ शुरू गरेको प्रअ शाहीको भनाइ थियो । असार २ गते सबै विद्यार्थीलाई पाठ्यपुस्तक वितरण गरिएको थियो ।

कक्षा १ देखि ५ सम्म सञ्चालनमा रहेको विद्यालयमा १६५ जना विद्यार्थी यो वर्ष भर्ना भएर पाठ्यपुस्तक वितरण गरिएको विद्यालयले जनाएको छ ।

विद्यालयमा ७ शिक्षक र १ कर्मचारी छन् । सबै ८ जनालाई नै टोलमा परिचालन गरेर पढाइ शुरू गरेको विद्यालयले जनाएको छ । विद्यालय सेवा क्षेत्रभित्रका ८ बस्तीमा पढाइ सञ्चालन गरिएको छ ।

प्रत्येक बस्तीमा १–१ शिक्षक पुगेर सहजीकरण तथा पढाइ शुरू भएको छ । 

पहिलो चरणमा अभिभावकसहित भेला गराएर अहिले विश्वभरमा फैलिरहेको कोरोना भाइरसपछि विद्यार्थीमा परेको प्रभावबारे सहजीकरण गर्ने गरिएको छ ।  

बालविकास केन्द्रदेखि ५ कक्षासम्मका विद्यार्थीलाई सामाजिक दूरी कायम गराएर पढाइ शुरू गरिएको छ । शहरबस्तीमा नै आएर छोराछोरीको अवस्थाबारे जानकारीका साथै टोलमा भएका सबै विद्यार्थीलाई भेला गराएर सहजीकरण गर्ने गरेको अभिभावक मदन रोकायाले बताए । पहिलो चरणमा टोलमा अनुगमन तथा विद्यार्थीको अवस्थाको बारेमा जानकारी गर्ने, सिकाइमा सहजीकरण र अप्ठयारोमा सहयोग गर्ने रहेको छ ।

कोभिड १९–ले पारेको संकटका बेला निःशुल्क मनोसामाजिक परामर्श दिने गरेको शिक्षकले बताएका छन् । टोलमा पुगेर पढाइसँगै लेखनसीप सम्बन्धी कला, नियमित हात धुने बानीको विकास तथा सरसफाइ, आत्माबल बढाउने सम्बन्धी जानकारी गर्ने रहेको विद्यालयले जनाएको छ । शिक्षक नै टोलमा पुगेर विद्यार्थीलाई टोलमै पढाउने गरको यो बाजुराको पहिलो विद्यालय रहेको छ ।