मनसुनजन्य विपदबाट वैशाखयता एक सय चार जनाको मृत्यु, ४३ करोडको क्षति

फाइल फोटो।

मुलुकमा यही वैशाखदेखि अहिलेसम्म ८ सय ४ वटा विपद्जन्य घटना हुँदा १ सय ४ जनाको मृत्यु भएको छ। उक्त घटनामा परी तीन जना हराइरहेका र ३ सय ४९ जना घाइते भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। 

सबैभन्दा बढी क्षति चट्याङबाट भएको छ। चट्याङ परेर ४७ जनाले ज्यान गुमाएका छन् । दोस्रोमा पहिरोबाट ३६ जनाले ज्यान गुमाइसकेका छन्। 


Advertisement

विपद्का घटनाबाट अहिलेसम्म तीन हजार ६ सय परिवार प्रभावित भएका छन्। दुई हजार ५ सय १५ घरमा आंशिक र २ सय ४५ घर पूर्णक्षति भएको प्राधिकरणका प्रमुख कार्यकारी अधिकृत अनिल पोखरेलले जानकारी दिए। उक्त अवधिमा झण्डै ४३ करोड बराबरको आर्थिक तथा भौतिक क्षति भएको प्राधिकरणले जनाएको छ। 

प्राधिकरणका अनुसार उक्त अवधिमा १ सय ५२ ठाउँमा चट्याङ पर्दा ४७ जनाको मृत्यु भएको र १ सय ६१ जना घाइते भएका छन्। आगलागीका ३ सय ३९ घटना हुँदा सात जनाले ज्यान गुमाएका छन् भने ७१ जना घाइते भएका, १ सय ७० वटा घर पूर्णक्षति भएको र १ सय १० घर आंशिक क्षति भएको छ । उक्त अवधिमा २३ वटा सर्पको टोकाइका घटना भएकोमा १० जनाको मृत्यु भएको र १४ जना घाइते भएको कार्यकारी अधिकृत पोखरेलले बताए। 


Advertisement

उक्त अवधिमा बाढीका भने २३ घटना भएको छ। जसबाट चार जनाको मृत्यु र एक जना वेपत्ता छन् । प्राप्त विवरणानुसार यो बीचमा १ सय ७ वटा पहिरो खसेको र पहिरोमा परेर ३६ जनाले ज्यान गुमाएका छन्। पहिरोमा परी दुई जना बेपत्ता रहेको र २९ जना घाइते भएको प्राधिकरणले जनाएको छ। 

कमेन्ट गर्नुहोस्