सिन्धुपाल्चोकको बाह्रबीसे नगरपालिका वडा नम्बर– ५ जम्बु बजारमा बाढी र पहिरोले पुर्‍याएको धनजनको क्षतिको अवलोकन र प्रारम्भिक राहतसहित सिन्धुपाल्चोक प्रस्थान गरेका सभामुख अग्नि सापकोटा प्रतिकूल मौसमका कारण काभ्रेको धुलिखेलबाटै फिर्ता भएका छन् ।

सभामुख चढेको हेलिकप्टर प्रतिकूल मौसमका कारण धुलिखेलको आकाशबाट फिर्ता भएको सभामुखका प्रेस संयोजक श्रीधर न्यौपानेले फेसबूकमार्फत जानकारी दिएका छन् ।

'मौसम अनुकूल नहुँदा धुलिखेलको आकाशबाट फर्किनु पर्‍यो,' न्यौपानेले फेसबूकमा लेखेका छन् ।

सिन्धुपाल्चोक सभामुख सापकोटाको गृहजिल्ला हो ।

गएरातिको बाढी र पहिरोले जम्बु बजारका १५ घर बगाएको छ ।

यसक्रममा २० जना बेपत्ता भएका छन् भने २ जनाको शव फेला परेको जिल्ला प्रहरी कार्यालय सिन्धुपाल्चोकका प्रवक्ता प्रहरी नायव उपरीक्षक (डीएसपी) माधवप्रसाद काफ्लेले लोकान्तरलाई जानकारी दिए ।